ԵՐԵՎԱՆ, 8 փետրվարի-Sputnik. ՀՀ արտահանողների միության նախագահ Րաֆֆի Մխչյանը նախ խոսեց որպես գործարար, որը զբաղվում է արտահանմամբ ու ներկրմամբ։ Նրա խոսքով` մեր իշխանություններին չի մտահոգում, թե ինչպես են գործարարները զբաղվում առևտրաշրջանառությամբ։
«Ամեն վարորդ, ապրանք առաքող հասնում է Լարսի անցակետ և նրան այնտեղ ստորացնում են։ Մենք ինչո՞ւ պետք է մաքսային սահմանի զգացողություն ունենանք այնտեղ, եթե ԵՏՄ անդամ ենք։ Իսկ Կանաչ միջանցքի մասին ընդամենը խոսում են։ Այն մեր կառավարության հերթական միֆերից է»,- ասաց նա։
Լրագրողի այն հարցին, թե ինչո՞ւ նա խնդրի դեպքում չի զանգահարում վարչապետին, Մխչյանը պատասխանեց` անհրաժեշտության դեպքում զանգահարում է։
«Խնդիրներ կան, որ լուծվում են, բայց կարգն այդպես պետք է չլինի»,- ասաց նա։
Քաղաքագետ Ստեփան Սաֆարյանին էլ մինչ օրս հանգիստ չի տալիս այն հարցը, թե ինչու է Հայաստանը հանդիսանում ԵՏՄ անդամ` առանց որևէ երկրի հետ ընդհանուր սահման ունենալու։ Հարցի պատասխանը նրան իշխանության ոչ մի ներկայացուցիչ չի տվել։
«Խնդիրը քաղաքական է։ Մենք ստիպված ենք ԵՏՄ-ին Հայաստանի անդամակցությունը դիտարկել չգիտակցված, մենք մրցունակ չենք»,-ասաց Սաֆարյանը։
Հայրենական ապրանք արտադրողների միության նախագահ Վազգեն Սաֆարյանն էլ, հակառակը, կարծում է, որ մենք ճիշտ որոշում ենք կայացրել` անդամագրվելով ԵՏՄ-ին։
«Իմ կարծիքով՝ դա ճիշտ որոշում է եղել, որովհետև մենք դրա համար պայքարել ենք։ ՌԴ-ի հետ մեր տնտեսական կապերն ակտիվացել են։ Նախորդ տարի 130 հազար տոննա միրգ և բանջարեղեն է արտահանվել ՌԴ ։ Իսկ Եվրոպա միայն հիմնային մետաղներ ենք արտահանում»,- ասաց նա։
Մի հարցում բանախոսները միակարծիք էին` Հայաստանի տնտեսությունը, մեղմ ասած, բարվոք վիճակում չէ։
Հունվար-հոկտեմբեր ժամանակահատվածում Հայաստանի և Ռուսաստանի ապրանքաշրջանառությունը կազմել է 1,033 միլիարդ դոլար։ Հայաստանից արտահանումն ավելացել է 2,1 անգամ և կազմել 314,2 միլիոն դոլար։ Հայաստանը հիմնականում պարենամթերք ու գյուղմթերք արտահանում է Ռուսաստան։
Ռուսաստանը Հայաստանում օտարերկրյա գլխավոր ներդրողն է։
