ԵՐԵՎԱՆ, 11 փետրվարի-Sputnik. Առաջնորդանիստ Սուրբ Սարգիս եկեղեցի ուղղվող տարեց վարորդն իր ուղևորին զարմացած հարցրեց՝ դուք դեռ եկեղեցի չեք գնացել:
«Ես առավոտից արթացա, գնացի, մոմ վառեցի, նոր սկսեցի աշխատանքս: Անպայման գնացեք աղոթելու մենակ ձեր համար չէ, զինվորների համար էլ»,-առանց հարցին սպասելու պատմեց վարորդը:
Առաջնորդանիստ Սուրբ Սարգիս եկեղեցին սովորականից մարդաշատ էր: Սիրո բարեխոս Սուրբ Սարգիս զորավարի տոնին եկեղեցի էին շտապում ոչ միայն ձեռք ձեռքի տված սիրահարներ, այլև մարդիկ ում համար տոնը մեկ ամբողջացում ունի՝ եկեղեցական: Կեսօրին մոտ եկեղեցի այցելողները ներկա գտնվեցին մի հիշարժան արարողության: Հանրապետության նախագահ Սերժ Սարգսյանի մասնակցությամբ եկեղեցում մատուցվեց պատարագ, որից հետո Մայր Աթոռ Սուրբ Էջմիածնից բերված Ս.Սարգսի մասունքակիր աջով օրհնվեցին մի շարք զինծառայողներ: Թերսև այդ արարողակարգից ոգևորված հավատացյալներից մեկը տեսավ մի տղա երեխայի ու բացականչեց. «Այ սա է մեր ազգի ապագան, մեր զինվորը»:
Այնուհետև, առաջնորդարանի դահլիճում տեղի ունեցավ միջոցառմանը ներկա պարտադիր ժամկետային լավագույն զինծառայողների խրախուսման հանդիսավոր արարողություն: Նախագահ Սարգսյանը շնորհավորեց նրանց՝ Սուրբ Սարգիս զորավարի հիշատակության օրվա առթիվ:
«Վաղուց Սուրբ Սարգիսը դարձել է խիզախության, անձնազոհության խորհրդանիշ մեր զինվորների և երիտասարդների համար: Ուստի, ուզում եմ հատկապես շնորհավորել այս դահլիճում գտնվող մեր զինվորներին: Դուք, իհարկե, կադրային զինվորականներ չեք, դուք ժամկետային ծառայության զինվորներ եք, որ այս կյանքում ունեք տարբեր նպատակներ, տարբեր ծրագրեր ու երազանքներ: Ես վստահ եմ, որ այդ երազանքներն իրականանալու են, և այս պահին ձեզ բոլորիդ միավորում է հայկական բանակի զինվորի հագուստն ու ձեր վճռականությունը՝ պաշտպանել մեր հայրենիքը»,-ասաց նախագահը:
Նա ներկա զինվորներին քաջալերեց, ասելով, որ երբ առաջնագծում են, կարող են վստահ լինել, որ իրենց թիկունքում կանգնած է վաղվա հաղթանակին հավատացող մի հինավուրց և ուժեղ ազգ:
«Այստեղ ներկա են զինվորներ, ովքեր անցյալ տարվա ապրիլին պաշտպանեցին մեր պատիվը, պաշտպանեցին մեր անկախությունը, մեր սահմանների անքակտելիությունը: Ցավոք, շատ արժանիներ այսօր շարքում չեն, բայց նրանք մեզ հետ են, որովհետև նրանք իրենց կյանքի գնով հնարավոր դարձրին այն, ինչը դուք միասին արեցիք և, իհարկե, անմահացան:
Գիտեք, սիրելի՛ զինվորներ, խիզախությունը, քաջությունը ձեզնից անբաժան պետք է լինեն, բայց մեկ անգամ ևս կրկնում եմ, որ դուք պետք է խիզախության, քաջության հետ այնպես անեք, որ ողջ մնաք, որպեսզի մեր ազգը հարատևի, որպեսզի մեր ժողովրդի լավագույն տեսակը ավելանա, շատանա»,-ասաց նախագահը:
Երկրի ղեկավար, գերագույն գլխավոր հրամանատար Սերժ Սարգսյանը ներկա զինվորներին տեղեկացրեց, որ նրանց կտրվի խրախուսական տասնօրյա արձակուրդ: Նա հույս հայտնեց, որ այդ օրերին, հարազատների ու բարեկամների հետ լինելով, նրանք ուժ ու ավյուն կստանան ու կվերադառնան զորքեր:
«Թո՛ղ Սուրբ Սարգիսն ապահովի ձեզ բարի ու անփորձանք ծառայությունը: Թո՛ղ այսօրվա օրհնանքները և այսօրվա աղոթքները միշտ անպակաս լինեն ձեզնից»,-իր խոսքը եզրափակեց նախագահը:
