ԵՐԵՎԱՆ, 18 փետրվարի — Sputnik. ՀՀ նախագահ Սերժ Սարգսյանը Երկրապահ կամավորականների միության 11-րդ համագումարի մեկնարկից առաջ ելույթ ունեցավ և հայտնեց, որ իր թիմակիցներն առաջիկա ԱԺ ընտրություններում ժողովրդի քվեն ստանալու դեպքում մարդկանց չեն խաբելու ու չեն ասելու, որ Հայաստանը դարձնելու են դրախտ։
«Մենք ընտրություններին գնում ենք քաջածանոթ մարդկանցով, բայց նոր թիմով, որի ձայնը բարձր է հնչելու»,- ասաց նախագահը։
Նրա խոսքով՝ իր նշած թիմում ընդգրկված է լինելու Մանվել Գրիգորյանը:
«Այդ թիմում ներգրավել ենք նաև մեր հարգարժան գեներալին որպես ակնառու խորհրդանիշ, որ յուրաքանչյուր նախաձեռնության ու քվեարկության ժամանակ տեսնեն գեներալի հայացքը, որն ազատամարտի մարմնավորումն է և պարտադրանքն է մեր հետագա հաղթանակների»,- ասաց երկրի ղեկավարը։
Նախագահի խոսքով` Ադրբեջանը պատրանքներ ունի, որ ընտրություններին նախապատրաստվելիս մեր երկրի զգոնությունը կթուլանա, հետևաբար նա չբացառեց ադրբեջանական գործողությունները։
«Մենք Ադրբեջանին տառապանք չենք ցանկանում, բայց ոչ մեկին թույլ չենք տա տենչալ մեր տառապանքը»,- ասաց նա։
ՀՀ նախագահի խոսքով՝ 90-ական թվականների սկզբներին, երբ շաբաթը մեկ Ադրբեջանում պաշտպանության նախարար էր փոխվում, նրանցից յուրաքանչյուրն իր պարտականությունն էր համարում ելույթ ունենալ և ասել, որ մեկ շաբաթ հետո, մի քանի օր հետո ինքը Ստեփանակերտում թեյ է խմելու, բայց պատմությունը ցույց տվեց հակառակը՝ մեր հերոս զավակների ջանքերով այնպես ստացվեց, որ նրանք ոչ միայն Ստեփանակերտում թեյ չխմեցին, այլ զրկվեցին Աղդամում, Ֆիզուլիում, Ջաբրայիլում, Կուբաթլիում, Քարվաճառում և այլ վայրերում թեյ խմելուց:
