ԵՐԵՎԱՆ, 4 մարտի – Sputnik. 2017թ-ի ապրիլի 25-ին ուժի մեջ է մտնում Գնումների մասին ՀՀ նոր օրենքը, որից հետո իրար և որոշ պաշտոնյաների հետ փոխկապակցված ընկերություններն այլևս չեն կարողանա մասնակցել պետական գնման մրցույթներին:
«Նոր օրենքով բացառում է այն մեխանիզմը, երբ նույն մարդու` տարբեր եղանակներով ստեղծված կազմակերպություններն իմիտացիոն մրցակցային միջավայր են ստեղծում և փորձում են կեղծ միջավայր ապահովել»,- Sputnik Արմենիայի հետ զրույցում ներկայացնելով նոր օրենքի պահանջը` ասաց ՀՀ ֆինանսների նախարարության ներքին ֆինանսական հսկողության և պետական գնումների մեթոդաբանության վարչության պետ Սերգեյ Շահնազարյանը:
Իսկ թե հայտարարվող մրցույթներին ինչ կազմակերպություններ են մասնակցելու հայտ ներկայացրել և ովքեր են դրանց իրական սեփականատերերը, այսուհետև նրանց անունները կհրապարակվեն գնումների էլեկտրոնային համակարգի armeps.am կայքում, ինչն էլ, բարեփոխման հեղինակների համոզմամբ, ապահովելու է պետգնումների նկատմամբ հանրային վերահսկողությունը՝ բացառելով ապօրինություններն ու մեքենայությունները:
Կառավարության որոշմամբ փոփոխություններ են կատարվել նաև մեկ անձից գնումներ կատարելու համակարգում: Եթե նախկինում հրատապության անվան տակ պետական մարմինները կարողանում էին ծառայությունների մատուցման պայմանագրեր կնքել իրենց նախընտրած կազմակերպությունների հետ, ապա այժմ հրատապ գնումները ևս իրականացվում են էլեկտրոնային համակարգում, բաց եղանակով:
«2016թ-ի աշնանից սկսած` պատվիրատուն այլևս հնարավորություն չունի գնային առաջարկ ստանալ իր նախընտրելի կազմակերպությունից և պայմանագիր կնքել: Այսինքն՝ armeps.am-ով հայտարարվում է պրոցես, որին հնարավորություն է ստանում մասնակցել ցանկացած կազմակերպություն»,- ասաց Շահնազարյանը:
Ինչ վերաբերում է իրական հրատապ գնումներին, դրանք կարող են իրականցվել միայն անհետաձգելի դեպքերում, երբ տվյալ գնումը հնարավոր չէր նախապես կանխատեսել: Մինչդեռ կանխատեսելի, ծրագրված գնումներն այլևս չեն կարող հրատապ համարվել:
Պաշտոնական վիճակագրության համաձայն` 2015թ-ին պետական մարմինները հրատապության հիմքով կատարել են 21.5 մլրդ դամի, 2016թ-ին՝ 6.6 մլրդ դրամի գնումներ:
Ֆինանսների նախարարությունում վստահ են, որ այս տարի այդ ցուցանիշը շատ ավելի փոքր թիվ է կազմելու:
