ԵՐԵՎԱՆ, 22 մարտի — Sputnik. Ֆինանսների նախարար Վարդան Արամյանն այսօր հայտարարեց, որ տարվա առաջին 2 ամիսներին կառավարությանը հաջողվել է 6.2 տոկոսով նախատեսվածից ավելի տնտեսական ակտիվություն գրանցել:
Նախկին վարչապետ, «Ազատ դեմոկրատներ» կուսակցության կողմից առաջադրված ԱԺ պատգամավորության թեկնածու Հրանտ Բագրատյանը Sputnik Արմենիայի հետ զրույցում, անդրադառնալով ֆինանսների նախարարի այս հայտարարությունը, վստահեցրեց, որ կառավարության հրապարակած տնտեսական ցուցանիշները պայմանավորված են բացառապես խորհրդարանական ընտրություններով։
«Ընտրությունները կավարտվեն, թվերը կիջնեն»,- վստահեցրեց Բագրատյանը:
Վարդան Արամյանը ևս չհերքեց տնտեսական ցուցանիշների և ընտրական գործընթացների կապը: Նրա խոսքով, տնտեսագիտության մեջ նույնիսկ ընդունված տեսակետ կա, որ ընտրական գործընթացներն ազդում են երկրի տնտեսության վրա:
Վարդան Արամյանն անգամ չբացառեց, որ ապրիլից հետո տնտեսական ակտիվության ցուցանիշը կարող է դանդաղել կամ նվազել այնպես, ինչպես դա եղավ անցյալ տարի:
«Հնարավոր է, որ 6%-ը որոշակի նվազման միտում ունի, բայց ես չեմ կարծում, որ առաջին 6 ամսվա ընթացքում այն կարող է 5 տոկոսից շատ ներքև իջնել: Ամեն դեպքում մենք հավակնում ենք բյուջեով նախատեսված 3.2 տոկոս տնտեսական աճից ավելի բարձր ցուցանիշ ունենալ: Հիմա կարող է մեր գործընկերները դա մեկնաբանեն, թե 6.2-ը վերջում դարձավ 3.2»,- ասաց նախարար՝ վստահեցնելով, որ տարվա առաջին 2 ամիսների լավատեսական ցուցանիշներից անկախ, կառավարությունը հանրության հետ անկեղծ է և վստահեցնում է՝ բյուջեով նախատեսված 3.2 %-ն ապահովելու է, իսկ հնարավորության դեպքում էլ՝ գերազանցելու:
