ԵՐԵՎԱՆ, 27 մարտի — Sputnik. Ինքնաթիռը, որի մեջ գտնվում էր Ղազախստանի ֆուտբոլի հավաքականը, հարկադիր վայրեջք է կատարել Երևանում: Արտակարգ վայրեջքի պատճառը շասսիի (գետնի վրա շարժվելու օդանավի հարմարանք) անսարքությունն էր, Twitter-ի իր միկրոբլոգում գրել է հավաքականի մամուլի քարտուղար Երբոլ Քաիրովը: Այդ մասին հայտնում է Sputnik Ղազախստանը:
Տվյալ պահին ուղևորները սպասում են, որ ինքնաթիռը փոխարինվի մեկ ուրիշով, և նրանք մեկնեն Հայաստանից:
«Օդանավի հրամանատարը որոշեց վերադառնալ օդանավակայան։ Չարտերային ինքնաթիռի փոխարինումից հետո ծրագրվում է ուղևորվել Ղազախստան»,– պարզաբանել է Քաիրովը:
Նախօրեին Երևանում կայացել է 2018-ի աշխարհի առաջնության նախընտրական խաղը, որում Ղազախստանը պարտվել է 2:0 հաշվով:
