ԵՐԵՎԱՆ, 2 ապրիլի — Sputnik. Դերասան Հայկ Մարությանը 9/47 տեղամասում մասնակցել է քվեարկության գործընթացին և նշել, որ քվեարկության գաղտնիությունը չի պահպանվում։
Նշված տեղամասում, որը տեղակայված է Երևանի Խուլ ու համրերի միության շենքում, որոշ ժամանակ անց պետք է քվեարկի իշխող ՀՀԿ-ի ցուցակը գլխավորող պաշտպանության նախարար Վիգեն Սարգսյանը։
Մարությանի խոսքով` տեղամասը սխալ է կահավորված, ընտրախցիկների հետևում թափանցիկ ապակիներով դռներ են, ինչը խախտում է քվեարկության գաղտնիությունը, քանի որ այնտեղից կարելի է հետևել ընտրողներին։
Բացի այդ, «Թրանսփերենսի Ինթերնեյշնլ» կազմակերպության դիտորդ Մանուշ Հովհաննիսյանն ասաց, որ բացի ընտրատեղամասի սխալ կահավորումից, նաև չեն անջատվել շենքում տեղադրված տեսանկարահանող սարքերը։ Սա նրա կարծիքով նույնպես քվեարկության գաղտնիության խախտում է։
Հանձնաժողովի նախագահ Արա Կիլիչյանն իր հերթին ասաց, որ դուռը փակ է, իսկ ընտրատեղամասում հանձնաժողովի անդամներից բացի, որոնց շարքում են նաև բոլոր քաղաքական ուժերի ներկայացուցիչները, դիտորդները, լրագրողները և ընտրողները, ոչ ոք չկա։ Հանձնաժողովի նախագահը խոստացավ լուծել հարցը, իսկ Մարությանին խորհուրդ տվեց, որ եթե նա խախտում է գտել, թող համապատասխան գրառում կատարի մատյանում։
