ԵՐԵՎԱՆ, 2 ապրիլի — Sputnik. ՀՀ նախագահ Սերժ Սարգսյանը քվեարկության էր եկել տիկնոջ` Ռիտա Սարգսյանի հետ։
Քվեարկությունից հետո լրագրողների հետ զրույցում նա ասաց, որ խաղաղությունից թանկ բան չկա։
«Խաղաղություն թանկ բան չկա։ Եվ մենք ամեն ինչ կանենք, որ մեր սահմաններին խաղաղություն լինի, մեր սահմանները լինեն անձեռնմխելի։ Այսօր շանսերը գնահատելու ժամանակը չէ, այսօր քվեներ ստանալու ժամանակն է»,- ասաց նախագահը` ընդգծելով, որ ինքը քվեարկեց հանուն խաղաղության ու սահմանների անձեռնմխելիության։
Ավելի վաղ իր քաղաքացիական պարտքն էր կատարել նաև երկրի վարչապետը։ Քվեարկությունից հետո Կարեն Կարապետյանը, ի պատասխան հարցի, թե հանուն ինչի է կատարել ընտրությունը նշել էր. «Հանուն մեր կարգախոսի իրականացման»: ՀՀԿ-ն ընտրություններին մասնակցել է «Անվտանգություն և առաջընթաց» կարգախոսով:
Հայաստանի Ազգային ժողովի հերթական ընտրություններին մասնակցելու համար առաջադրվել է 9 քաղաքական ուժ, որոնցից 5-ը կուսակցություններ են, 4-ը` կուսակցությունների դաշինքներ: Ընտրություններին մասնակցում են Հայաստանի Հանրապետական, «Հայկական վերածնունդ», «Ազատ դեմոկրատներ», «Հայ Յեղափոխական Դաշնակցություն», Հայաստանի Կոմունիստական կուսակցությունները, ինչպես նաև «Ելք», «Ծառուկյան», «Օհանյան-Րաֆֆի-Օսկանյան» և «Կոնգրես-ՀԺԿ» դաշինքները:
