ԵՐԵՎԱՆ, 2 ապրիլի — Sputnik. ՀՀ ԱԺ նախագահ Գալուստ Սահակյանը քվեարկության էր եկել տիկնոջ հետ։ Քաղաքացիական պարտքը կատարելուց հետո նա ասաց, որ քվեարկել է հանուն պետության։
«Հայ ժողովրդի համար ամենակարևոր գործոնը պետությունն է։ Մեր ժողովուրդը պետք է իմանա, որ բավականին երկար ժամանակ պետականություն չի ունեցել։ Այսօր այն հայը, որ այդ ճանապարհով է գնում, կարծում եմ նաև մտածում է իր երեխաների և իր ապագա կերտվածքի մասին»,- ասաց նա։
Նրա խոսքով` ՀՀ ղեկավարման համակարգը փոխվել է, և այժմ ոչ թե մի քանի մարդ է մտածում երկրի գործերի մասին, այլ ժողովրդից սկսած` ԱԺ-ով ու կառավարությունով միասնաբար են կարողանում որևէ բան մտածել։
«Մասնավորապես այս անգամ շատ կարևոր է, որ ժողովուրդը ցանկացած դեպքում կարող է իր առաջարկությունները ներկայացնել»,- ասաց նա։
Հայաստանի Ազգային ժողովի հերթական ընտրություններին մասնակցելու համար առաջադրվել է 9 քաղաքական ուժ, որոնցից 5-ը կուսակցություններ են, 4-ը` կուսակցությունների դաշինքներ: Ընտրություններին մասնակցում են Հայաստանի Հանրապետական, «Հայկական վերածնունդ», «Ազատ դեմոկրատներ», «Հայ Յեղափոխական Դաշնակցություն», Հայաստանի Կոմունիստական կուսակցությունները, ինչպես նաև «Ելք», «Ծառուկյան», «Օհանյան-Րաֆֆի-Օսկանյան» և «Կոնգրես-ՀԺԿ» դաշինքները:
