ԵՐԵՎԱՆ, 2 ապրիլի — Sputnik. «Հայկական վերածնունդ» կուսակցության նախագահ Արթուր Բաղդասարյանը վստահ է՝ ՀՎԿ-ն ընտրությունների արդյունքում լինելու է առաջին եռյակում: Նման համոզմունք նա հայտնեց այսօր Երևանի Նիկոլ Աղբալյանի անվան թիվ 19 դպրոցում տեղակայված թիվ 9/49 ընտրատարածքում քվեարկությունը կատարելուց հետո:
«Հայկական վերածնունդ» կուսակցության առաջնորդը նաև հայտնեց, որ քվեարկել է «վերածնված Հայաստանի օգտին»:
«Որպեսզի 21-րդ դարում ունենանք ուժեղ, մրցունակ, ստեղծարար, բարեկեցիկ կյանք»,- լրագրողների հետ զրույցում ասաց Բաղդասարյանը:
ՀՎԿ առաջնորդն ընտրության էր եկել կնոջ և դստեր հետ:
Հայաստանի Ազգային ժողովի հերթական ընտրություններին մասնակցելու համար առաջադրվել է 9 քաղաքական ուժ, որոնցից 5-ը կուսակցություններ են, 4-ը` կուսակցությունների դաշինքներ: Ընտրություններին մասնակցում են Հայաստանի Հանրապետական, «Հայկական վերածնունդ», «Ազատ դեմոկրատներ», «Հայ Յեղափոխական Դաշնակցություն», Հայաստանի Կոմունիստական կուսակցությունները, ինչպես նաև «Ելք», «Ծառուկյան», «Օհանյան-Րաֆֆի-Օսկանյան» և «Կոնգրես-ՀԺԿ» դաշինքները:
