ԵՐԵՎԱՆ, 2 ապրիլի — Sputnik. 9/11 ընտրատեղամասում ընտրողներից մեկն առաջարկեց հանձնել ոտքի մատնահետքերը, քանի որ համակարգը չի ճանաչել իր մատերից և ոչ մեկը։
Մեծահասակ քաղաքացին մոտեցել է էլեկտրոնային սարքավորումը սպասարկող աշխատակցին և փորձել հանձնել մատնահետքերը։ Սակայն բոլոր մատերի սքանավորման ապարդյուն փորձերից հետո, տղամարդը դիմել է հանձնաժողովի անդամներին և ամենայն լրջությամբ ասել.
«Ի՞նչ է հիմա ոտքիս մատնահետքերը հանձնեմ», — դիմել է նա աղջիկներից մեկին։
Բարեբախտաբար, դրա անհրաժեշտությունը չի եղել։ Նրան համապատասխան կտրոն են փոխանցել, և նա կարողացել է կատարել իր ընտրությունը։
Մեկ այլ քաղաքացի կտրականապես հրաժարվել է հանձնել մատնահետքերը` հայտարարելով, որ չի ցանկանում որևէ մեկն ունենա իր տվյալները։
«Ես չգիտեմ` ինչ նպատակներով եք դրանք օգտագործելու», — պատասխանեց կինը։
Սակայն, ի վերջո, հաջողվեց նրան համոզել, և նա էլ մասնակցեց քվեարկությանը։
Դողացող ձեռքերով մեկ այլ տարեց տղամարդու մատնահետքերը ևս չհաջողվեց վերցնել։ Կտրոնը նրան հանձնվեց անձնագրի տվյալները վերցնելուց հետո միայն։