ԵՐԵՎԱՆ, 7 ապրիլի-Sputnik. Նախագահ Սարգսյանը, շնորհավորելով մայրության և գեղեցկության տոնի առթիվ, մաղթել է գեղեցիկ տոնը դիմավորել բարձր տրամադրությամբ:
«Մենք՝ որպես պետություն և հասարակություն, մտնում ենք փոփոխությունների և զարգացման կարևորագույն փուլ, և այս գործընթացներում առանձնակի մեծ է լինելու ձեր դերակատարությունը։ Բազմադարյա Հայաստանը ամուր է եղել նաև ձեզնով, իսկ այսօր՝ նորացող մեր հայրենիքը ուժեղ և առաջադեմ է առավելապես ձեզնով: Ամուր և ավանդական ընտանիքը առհավատչյան է մեր ժողովրդի հարատևության, և այդ հավերժության պատվարը դարձյալ դուք եք»,-ասված է հաղորդագրության մեջ։
Նախագահն առանձնահատուկ շնորհավորել է այն մայրերին, որոնց որդիները հսկում և անառիկ են պահում մեր երկրի սահմանները։ Երկրի ղեկավարը գլուխ է խոնարհում այն մայրերի առջև, որոնց որդիներն անմահացան:
«Կրկին շնորհավորելով՝ մաղթում եմ ձեզ ընտանեկան սեր ու ջերմություն, աշխատանքային հաջողություններ, հասարակական եռանդուն, արդյունավետ գործունեություն և հատկապես՝ կանացի հմայք ու գեղեցկություն»,- ասված է ուղերձում։