Հայկական ժամանակ. «Ուզում է ԱԺ գնալ»
Թերթի տեղեկություններով` արդարադատության նախարար Արփինե Հովհաննիսյանը ցանկանում է մանդատ ստանալ և գնալ նոր կազմավորված ԱԺ։
«Խնդիրն այն է, որ եթե Արփինե Հովհաննիսյանը նոր ձևավորվող կառավարությունում այս անգամ էլ նշանակվի արդարադատության նախարարի պաշտոնում, ապա ընդամենը մեկ տարի հետո նորից հրաժարական է տալու, քանի որ այդ ժամանակ ավարտվելու է Սերժ Սարգսյանի նախագահության ժամկետը։ Դրա հետ միաժամանակ ավարտվելու է կառավարության լիազորությունների ժամկետը, և այդ մարմինը վարչապետի ղեկավարությամբ հրաժարական է տալու։ Այդ ժամանակ արդեն հայտնի չէ` Արփինե Հովհաննիսյանը կվերանշանակվի՞ այդ պաշտոնում, թե՞ կմնա ձեռնունայն»,- գրում է թերթը։
Ժամանակ. «Ընդմիշտ կհեռանա»
Թերթի փոխանցմամբ` ՀՀ պաշտպանության նախկին նախարար Սեյրան Օհանյանն այս օրերին գտնվում է Ռուսաստանի Դաշնությունում։
«Չի բացառվում, որ այնտեղ ունեցած հանդիպումների արդյունքում Սեյրան Օհանյանը հայաստանյան քաղաքական ծրագրերին հրաժեշտ տա, ընդմիշտ տեղափոխվի Ռուսաստան և աշխատի ռուսական բանակում։ ՀՀ պաշտպանության նախկին նախարարն ու ՌԴ պաշտպանության նախարար Սերգեյ Շոյգուն շարունակում են շատ սերտ հարաբերություններ պահպանել։ Սեյրան Օհանյանը կարող է ղեկավար աշխատանքի անցնել ռուսական բանակի կրթական հաստատություններից մեկում»,- գրում է թերթը։
Փաստ. «Վրաստանի իշխանություններին ներքին խողովակներով բազմիցս զգուշացվել է, որ Հայոց ցեղասպանության ճանաչումն անպատիժ չի մնա»
Թերթի հյուրն է Վրաստանի հարցերով փորձագետ Ալիկ Էրոյանցը։ Նա խոսել է Վրաստանի իշխանությունների կողմից ցեղասպանության ճանաչման գործընթացների մասին։
«Առայժմ ոչինչ չկա, պետք է սպասել մինչև ապրիլի 24-ը։ Բայցևայնպես, կարծում եմ, որ լուրջ ակնկալիքներ ունենալ պետք չէ, հատկապես եթե հաշվի առնենք նախորդ տարիների փորձն ու ընդհանրապես այդ հարցի վերաբերյալ դիրքորոշումը։ Իսկ այդ դիրքորոշման հիմնական պատճառը թուրքական գործոնն է, թուրք-վրացական հարաբերությունների գոյություն ունեցող բարձր մակարդակը։Արդեն քանի տարի է` Թուրքիան Վրաստանի առևտրային գործընկերն է։ Ուստի Վրաստանի տնտեսությունը չափազանց զգայուն է այդ հարաբերությունների նկատմամբ։ Տեղափոխվենք քաղաքական հարթություն` եթե Վրաստանը ճանաչի Հայոց ցեղասպանությունը, դա անարձագանք չի մնա, Անկարան հանդես կգա բավականին խիստ դիրքորոշմամբ, ըստ ամենայնի, կլինեն սպառնալիքներ, պատժամիջոցներ, ընդհուպ մինչև դիվանագիտական հարաբերությունների սառեցում»,- գրում է թերթը։
Իրավունք. «ՌԴ-ում «Եհովայի վկաներն» արգելվեցին, տարոսը մեզ»
Ռուսաստանի Գերագույն դատարանը «Եհովայի վկաների կառավարման կենտրոն» կազմակերպությունը ճանաչել է ծայրահեղական ու արգելել դրա գործունեությունը։
«Մարտի վերջին արդարադատության նախարարությունը կասեցրել էր կառավարման կենտրոնի գործունեությունը, որը Ռուսաստանում «Եհովայի վկաների» կենտրոնական կազմակերպությունն է։ Արդարադատության նախարարությունը հավաստիացնում է, որ կազմակերպությունը ծայրահեղական գրականություն է տարածում։ «Եհովայի վկաները» պատասխան հայց են ներկայացրել Արդարադատության նախարարության դեմ` պահանջելով կազմակերպությունը ճանաչել քաղաքական ռեպրեսիաների զոհ։ Գերագույն դատարանը մերժել է այդ հայցը»,- գրում է թերթը։