ԵՐԵՎԱՆ, 21 ապրիլի — Sputnik. Հայաստանյան տեսաբացիկում ներկայացված կլինի Արծվիկի կյանքի ամենահիշարժան և տպավորիչ ակնթարթը՝ հաղթանակը «Դեպի Եվրատեսիլ»-ում: Բացի այդ, տեսանյութում կլինի Արծվիկի թռիչքը օդապարիկով, որը, ինչպես «Եվրատեսիլին» մասնակցելը, տարիներ շարունակ եղել է նրա երազանքը: Հայաստանյան պատվիրակին թռիչքի ընթացքում ուղեկցել են մրցութային «Fly with me» երգի հեղինակներ Ավետ Բարսեղյանը և Լիլիթ Նավասարդյանը: Ինչպես երգում, այնպես էլ տեսաբացիկում, նրանք կոչ են անում եվրատեսիլյան երկրպագուներին «թռչել» Արծվիկի հետ: Այս մասին հայտնում է Հայաստանի հանրային հեռուստաընկերությունը։
«Ես անմոռանալի տպավորություն ստացա թռիչքիցս: Աննկարագարելի է, թե ինչ ես զգում, երբ գտնվում ես երկրի ու երկնքի միջև՝ ամպերին այդքան մոտ: Հույս ունեմ, որ տեսաբացիկի միջոցով էմոցիաներս կկարողանամ փոխանցել երկրպագուներիս»,- նշում է Արծվիկը:
Տեսաբացիկում, որպես Հայաստանը ներկայացնող հետաքրքիր եւ յուրահատուկ վայր, ընտրվել է Նորավանքը: Բացի այդ, ներկայացվում է նաև ընկերական ջերմ հանդիպում գինու շուրջ, որտեղ Արծվիկին ուղեկցում են բեք-վոկալիստներ Անուշիկ Տեր-Ղուկասյանը, Ամալյա Մարգարյանը, Վիկտորյա Պողոսյանը և երգի համահեղինակ Դավիթ Ծերունյանը: Երիտասարդների հանդիպումը խորհրդանշում է հայկական խնջույքներին գինեխմության ավանդույթը:
Նկարահանումներին աջակցել են «Skyball» ընկերությունն ու «Մալոկո» սրճարանը:
Տեսաբացիկներն այս տարի կներկայացնեն մրցույթի մասնակիցների զգացողությունները բեմ բարձրանալուց անմիջապես առաջ, ինչպես նաև այն ակնթարթները, որոնք առավելագույնս տպավորել են արտիստներին:
«Եվրատեսիլ-2017» մրցույթն այս տարի կանցկացվի մայիսի 9-ին, 11-ին և 13-ին Կիևում: Հայաստանի ներկայացուցիչը՝ Արծվիկը, ելույթ կունենա մայիսի 9-ին՝ 1-ին կիսաեզրափակչի ընթացքում: Մրցույթն այս տարի կանցկացվի «Տոնենք բազմազանությունը» կարգախոսի ներքո:
