ԵՐԵՎԱՆ, 24 ապրիլի — Sputnik. ՀՀ արտգործնախարարի տեղակալ Շավարշ Քոչարյանը լրագրողների հետ զրույցում նշեց, որ Թուրքիայի` հայերին ոչնչացնելու ծրագիրը չհաջողվեց։
«Մեզ ոչ միայն չհաջողվեց ոչնչացնել, այլև մենք վերապրում ենք մի նոր զարթոնք»,-- վստահեցրեց Քոչարյանը։
Ցեղասպանության ճանաչման հարցում նա կարևորեց հայերի միասնականությունը։
«Շատ կարևոր է, որ մենք բոլոր դասերը քաղենք, որպեսզի չկրկնվի ոչ միայն Հայաստանում, այլ նաև մաբողջ աշխարհում։ Իհարկե, կարևոր է յուրաքանչյուր երկրի ճանաչումը, շատ կարևոր է, որ ԱՄՆ-ն ոչ միայն նահանգային մակարդակով, այլ դաշնային մակարդակով ճանաչի Ցեղասպանությունը, բայց վերջնական նպատակն այն է, որ հենց Թուրքիան ճանաչի Հայոց ցեղասպանությունը։ Մյուս երկրների ճանաչումը միտված է հենց այդ նպատակին»,- ասաց Քոչարյանը։
1915 թվականին տեղի ունեցած ոճրագործությունը, որի հետևանքով Օսմանյան կայսրությունում ավելի քան 1.5 մլն հայ է սպանվել, ХХ դարի առաջին ցեղասպանությունն է համարվում։ Թուրքիան ավանդաբար մերժում է ցեղասպանություն իրագործելու մեղադրանքներն ու անչափ ցավագին է ընդունում այդ հարցի վերաբերյալ քննադատությունները։
Հայոց ցեղասպանությունն առաջինը ճանաչել է Ուրուգվայը 1965 թվականին, այնուհետև նրա օրինակին են հետևել Ֆրանսիան, Իտալիան, Գերմանիան, Հոլանդիան, Բելգիան, Լեհաստանը, Լիտվան, Սլովակիան, Շվեդիան, Շվեյցարիան, Հունաստանը, Կիպրոսը, Լիբանանը, Կանադան, Վենեսուելան, Արգենտինան, Բրազիլիան, Չիլին, Վատիկանը, Բոլիվիան, Չեխիան, Ավստրիան, Լյուքսեմբուրգը։ ԱՄՆ 50 նահանգներից 44-ը պաշտոնապես ճանաչել և դատապարտել է Հայոց ցեղասպանությունը, ինչպես նաև ապրիլի 24-ը հայտարարել Հայոց ցեղասպանության զոհերի հիշատակի օր։
