ԵՐԵՎԱՆ, 24 ապրիլի — Sputnik. Իրաքյան Քրդստանից պատվիրակություն է ժամանել Հայաստան` Հայոց ցեղասպանության զոհերին հարգանքի տուրք մատուցելու նպատակով։
«Անհնար է մոռանալ Օսմանյան կայսրությունում իրագործված իրադարձությունները։ Մենք ժամանել ենք ջարդերի զոհ դարձած հայերին հարգանքի տուրք մատուցելու համար», — Sputnik Արմենիայի թղթակցի հետ զրույցում ասաց իրաքյան Քրդստանի առաջնորդներից մեկը` Շիվան Շարիֆը։
Շարիֆը նշեց, որ Հայոց ցեղասպանության մասին իմացել է իր հայ ընկերներից, որոնք ապրում են և Իրաքում, և Հայաստանում։
Հայերի ջարդերի, նրանց տեղահանման և նպատակային ոչնչացման պատմությունը ապշեցրել է նաև Հնդկաստանի քաղաքացի Ակիլ Աատիշին։
Նա Հայաստան է ժամանել ընկերների հետ, որպեսզի խոնարհվի անմեղ զոհերի առջև` հուսալով, որ առաջիկայում արդարությունը կհաղթանակի, և աշխարհի բոլոր երկրները կճանաչեն մարդկության դեմ իրագործված այս սարսափելի ոճրագործությունը։
1915 թվականին տեղի ունեցած ոճրագործությունը, որի հետևանքով Օսմանյան կայսրությունում ավելի քան 1.5 մլն հայ է սպանվել, ХХ դարի առաջին ցեղասպանությունն է համարվում։ Թուրքիան ավանդաբար մերժում է ցեղասպանություն իրագործելու մեղադրանքներն ու անչափ ցավագին է ընդունում այդ հարցի վերաբերյալ քննադատությունները։
Հայոց ցեղասպանությունն առաջինը ճանաչել է Ուրուգվայը 1965 թվականին, այնուհետև նրա օրինակին են հետևել Ֆրանսիան, Իտալիան, Գերմանիան, Հոլանդիան, Բելգիան, Լեհաստանը, Լիտվան, Սլովակիան, Շվեդիան, Շվեյցարիան, Հունաստանը, Կիպրոսը, Լիբանանը, Կանադան, Վենեսուելան, Արգենտինան, Բրազիլիան, Չիլին, Վատիկանը, Բոլիվիան, Չեխիան, Ավստրիան, Լյուքսեմբուրգը։ ԱՄՆ 50 նահանգներից 45-ը պաշտոնապես ճանաչել և դատապարտել է Հայոց ցեղասպանությունը, ինչպես նաև ապրիլի 24-ը հայտարարել Հայոց ցեղասպանության զոհերի հիշատակի օր։
