ԵՐԵՎԱՆ, 28 ապրիլի — Sputnik. ՀՀ Սահմանադրական դատարանը մերժեց Կոնգրես-ՀԺԿ դաշինքի՝ ապրիլի 2-ի խորհրդարանական ընտրությունների արդյունքները վիճարկող դիմումը և որոշեց ուժի մեջ թողնել ԿԸՀ-ի ապրիլի 9-ի՝ ԱԺ ընտրությունների արդյունքների արձանագրությունը: Սահմանադրական դատարանի որոշումն ընթերցեց ՍԴ նախագահ Գագիկ Հարությունյանը:
ՍԴ-ն դիմումի քննությունը սկսել էր ապրիլի 25-ին, իսկ որոշում կայացնելու համար խորհրդակցական սենյակ էր գնացել ապրիլի 28-ին:
«Կոնգրես-ՀԺԿ դաշինքի կողմից ՀՀ Ազգային ժողովի 2017թ. ապրիլի 2-ին կայացած ընտրությունների ընթացքում օրենքով սահմանված կարգով ու ժամկետներում չեն արձանագրվել ու բողոքարկման առարկա դարձվել իրավախախտումների վերաբերյալ ապացուցողական նշանակություն ունեցող այնպիսի փաստեր, որոնք, ներկայացնելով Կենտրոնական ընտրական հանձնաժողով, կարող էին հիմք ծառայել ՀՀ Ընտրական օրենսգրքի 95-րդ հոդվածի առաջին մասի այլ կետով որոշում կայացնելու համար»,- նշեց Հարությունյանը:
Այսպիսով՝ նորընտիր Ազգային ժողովի առաջին նիստը կգումարվի Սահմանադրական դատարանի որոշումից հետո երրորդ հինգշաբթի օրը: Այսինքն, քանի որ որոշումը հրապարակվեց ապրիլի 28-ին, ապա նոր ԱԺ-ի առաջին նիստը կկայանա մայիսի 18-ին:
Հայաստանում Ազգային ժողովի հերթական ընտրությունները կայացել են 2017թ. ապրիլի 2-ին: Ընտրությունների արդյունքներով խորհրդարան է անցել 4 քաղաքական ուժ` ՀՀԿ-ն, ՀՅԴ-ն, «Ելք» և «Ծառուկյան» դաշինքները:
