ԵՐԵՎԱՆ, 28 ապրիլի — Sputnik. ՀՀ կառավարությունը տարիներ շարունակ միլիոնավոր դրամների սուբսիդիա է տրամադրում դիզելային վառելանյութ և պարարտանյութ ներկրողներին, որպեսզի այդ գումարով հողօգտագործողներին գյուղատնտեսական աշխատանքների համար մատչելի գներով դիզելային վառելանյութ ու պարարտանյութ տրամադրի: Ու թեև նախորդ տարիներին ծրագրում չարաշահումներ էին բացահայտվել և դրա հետագա իրականացումը կասկածի տակ էր դրվել, այնուհանդերձ կառավարությունը որոշել է շարունակել այն:
Այս մասին այսօր Sputnik Արմենիա մամուլի կենտրոնում լրագրողների հետ հանդիպման ժամանակ ասաց ՀՀ գյուղատնտեսության փոխնախարար Աշոտ Հարությունյանը:
Կառավարությունը մրցույթներն արդեն իրականացրել է, հաղթող ընկերությունները հայտնի են:
Պարարտանյութի գնման մրցույթին մասնակցած 19 ընկերությունից ամենացածր գինն առաջարկել են 3-ը՝ հայաստանյան «Մասիսի բերրիություն», ռուսական «Դոնսկոյ ագրոխիմ» և իրանական «Բարան գրուպ» ընկերությունները:
Հետագայում, սակայն, իրանական ընկերությունը հրաժարվել է մրցույթից՝ ֆինանսական խնդիրների պատճառով և գնման պատվերը ստացել են «Մասիսի բերրիությունն» ու «Դոնսկոյ ագրոխիմը»:
«Մասիսի բերրիությունը» Արմավիրի մարզին պարարտանյութը մատակարարում է մեկ պարկը 6580 դրամով, սուբսիդիայի չափը կազմում է մեկ պարկին 580 դրամ: Մնացած մարզերին՝ 6990 դրամ, որից 990 դրամը պետության կողմից տրվող սուբսիդիան է: Իսկ «Դոնսկոյ ագրոխիմը» ներկայացրել է 7000 դրամ գնով, պետության սուբսիդիան արդեն կկազմի 1000 դրամ»,- հայտնեց Աշոտ Հարությունյանը:
Դիզելային վառելիքի գնման մրցույթին մասնակցել է 2 տեղական կազմակերպություն՝ «Ֆլեշը» և «Մաքս հուրը», որոնք էլ ստացել են մատակարարման պատվերը:
Գյուղատնտեսության փոխնախարարն ասաց, որ գյուղացու համար դիզվառելիքի գինն այս տարի չի փոխվի: Ինչպես և անցյալ տարի գյուղացին այն ձեռք կբերի 1 լիտրը 280 դրամով, անկախ այն հանգամանքից, թե ինչ գին կառաջարկի մատակարարը: Իսկ թե մրցույթը հաղթած ընկերություններն ինչ գին են առաջարկել, փոխնախարարը չբացահայտեց:
«Մենք նախապես պետբյուջեով նախատեսել ենք նախորդ տարվա գները: Բայց քանի որ այս պահի դրությամբ ընկերություններն առաջարկում են ավելի ցածր գին, նշանակում է սուբսիդիայի գումարի չափը արդեն կնվազի»,- ասաց փոխնախարարը:
Հիշեցնենք` 2016թ-ին դիզվառելիքի միակ մատակարարը «Ֆլեշ» ընկերությունն էր, որը սահմանել էր 1 լիտրի դիմաց 335 դրամ գին: Գյուղացին դրանից վճարում էր 280-ը, մնացած 55-ը տրամադրում էր կառավարությունը՝ սուբսիդիայի տեսքով:
Հիշեցնենք նաև, որ մի քանի տարի առաջ Վերահսկիչ պալատն ու ֆինանսների նախարարության ֆինանսական վերահսկողական տեսչությունն այս ծրագրում չարաշահումներ էին արձանագրել: Հարուցվել էր քրեական գործ, պետական միջոցների յուրացման մեղադրանքով ձերբակալվել էր Արարատի մարզպետարանի գյուղատնտեսության և բնապահպանության վարչության նախկին պետ Տիգրան Վիրաբյանը:
Պաշտոնական տվյալներով` ամենաշատ խախտումներն արձանագրվել էին Արարատի մարզում: Այստեղ պետությանը 83 միլիոն դրամի վնաս էր պատճառվել: Ի դեպ, այս գործի շրջանակում շրջանառում էին նաև նախկին վարչապետ, այդ տարիներին ԱԺ նախագահ Հովիկ Աբրահամյանի հարազատների անունները:
Ֆինանսական վերահսկողության տեսչության տվյալներով՝ Հովիկ Աբրահամյանի հայրենի Մխչյան համայնքին հատկացված դիզվառելիքի մոտ 65%-ը ձեռք էին բերել Աբրահամյանները՝ 35 հազարը՝ Հովիկ Աբրահամյանի եղբայր Հենրիկ Աբրահամյանը, 13 հազարը՝ Հովիկ Աբրահամյանի եղբոր որդին՝ Հովհաննես Աբրահամյանը:
