«Ժամանակ». Քննարկում՝ հեռացնել
Ծառուկյան դաշինքը քննարկում է ինքնաբացարկից հրաժարված պատգամավորներին խմբակցությունից հեռացնելու հարցը, որպեսզի ԱԺ-ում չհավակնեն որևէ պաշտոնի հանձնաժողովներում և խորհրդարանական պատվիրակությունում:
ԱԺ նոր կանոնակարգով խմբակցությունը իրավունք ունի պատգամավորին քվեարկությամբ հեռացնել խմբակցությունից:
«Իրատես». Կոստանյանը՝ նախարա՞ր
ՀՀԿ-ի ինքնաբացարկ հայտնեց նախարարներից միայն արդարադատության նախարար Արփինե Հովհաննիսյանն է դուրս մնացել:
Ասել է կառավարության հրաժարականից հետո արդարադատության նոր նախարար ենք ունենալու: Սա, թերևս ամենախոցելի ոլորտն է, որտեղ հանրությունը մշտապես սպասում է արմատական փոփոխություններ:
Թերթի տեղեկություններով իշխանությունում արդեն քննարկում են, թե ով կարող է լինել արդարադատության հաջորդ նախարարը: Ամենահավական թեկնածուն Գևորգ Կոստանյանն է:
«Հրապարակ». Հայտնի է՝ ով է համակարգել Ծառուկյանի դեմ ըմբոստությունը. նա նախ ստացել է Բաղրամյան 26-ի «դաբրոն»
«Հրապարակ» թերթը գրում է. «Ծառուկյան» դաշինքի «12-ի գործը», ըստ որոշ տեղեկությունների, համակարգել է ԲՀԿ-ական Աբրահամ Մանուկյանը։ Պարզելով, որ իր թիմը՝ Նապոլեոն Ազիզյան, Հարություն Ղարագյոզյան եւ հարազատ որդին՝ դաշինքի համամասնական ցուցակի 11-րդ համար Արթուր Մանուկյան, հայտնվել է 23 ինքնաբացարկ «ներկայացնողների» ցուցակում, Մանուկյանը գործի է անցել՝ նախաձեռնելով «քցվածների» իրավունքների վերականգման գործընթաց։
Նա նախ ստացել է Բաղրամյան 26-ի «դաբրոն», իսկ ԿԸՀ նիստից առաջ, որը պետք է քններ դիմումների հետ վերցնելու հարցը, երբ Ծառուկյանի թիկնազորի պետ Էդիկ Բաբայանն «ատչոտ» է պահանջել Աբրահամ Մանուկյանից, քանի որ իր միջնորդությամբ են Ազիզյանն ու Ղարագյոզյանը հայտնվել դաշինքի ցուցակում, նա Էդոյի հետ այցելել է Ազիզյանի առանձնատուն, որպեսզի վերջինիս իբր համոզի հետ կանգնել իր մտադրությունից։
Այնինչ ԿԸՀ-ում գրեթե նույն ժամին Մանուկյանների ներկայացուցիչը բողոքարկում էր նաև նրա որդու դիմումը։ Նշենք, որ ԲՀԿ-ական շրջանակներում խոսում են, որ իրականում «քցել» են Ծառուկյանին, որն աստղաբաշխական գումարներ է տվել այս 23-ին, բայց նրանք իրենց խոստացած ձայների չնչին մասն անգամ չեն ապահովել»:
«168 ժամ». «Պլատոնի» թակարդը. ԵՏՄ-ի «շնորհիվ» հայկական բեռնափոխադրումները կթանկանան
«168 ժամ» թերթը գրում է. «Տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանն օրերս ընդունել է ՌԴ-ում «Պլատոն» համակարգը ներդրած կազմակերպության գլխավոր տնօրեն Անտոն Զամկովին։ Կազմակերպությունը պետք է ուսումնասիրի Հայաստանում համակարգի ներդրման հնարավորությունը, ներկայացնի տնտեսական հիմնավորումները:
«Պլատոն» համակարգը հնարավորություն է տալիս հետևել 12 տոննա և ավելի բեռի տեղաշարժի ամբողջ ընթացքին, թե որտե՞ղ է գտնվում, քանի՞ կիլոմետր ճանապարհ է անցել, տեղեկություն ստանալ տրանսպորտային միջոցի չափերի, բեռի քաշի մասին և այլն։ Այդ ամենը կարող է վերահսկել ոչ միայն բեռնափոխադրողը, այլ նաև պատվիրատուն։ Այս ամենը, բնականաբար, կատարվում է որոշակի գումարի դիմաց։
