ԵՐԵՎԱՆ, 9 մայիսի — Sputnik, Արմենուհի Մխոյան. Մարզային ու քաղաքային իշխանությունների ներկայացուցիչները, նախ հարգելով Հայենական մեծ պատերազմում զոհված հերոսների հիշատակը, ծաղկեպսակ դրեցին «Անմար կրակ»-ի մոտ: Անցած տարիների նման այս տարի ևս միջոցառմանը ներկա էին պատերազմի վետերանները:
Տոնական միջոցառմանը շնորհավորելով բոլորին` Շիրակի մարզպետ Հովսեփ Սիմոնյանը նշեց, որ 72 տարի առաջ ձեռք բերած հաղթանակը փառահեղ էր, ինչի համար պետք է շնորհակալ լինել թե՛ նրանց, ում կյանքի գնով վաստակվել է հաղթանակը և թե՛ նրանց, ում շարքերն այսօր նոսրանում են:
«Ջերմորեն շնորհավորում եմ բոլորիս Հաղթանակի եւ խաղաղության տոնի կապակցությամբ: Հայ ժողովրդի բազմադարյան պատմության մեջ մայիս ամիսը դարձավ հաղթանակների, հերոսական սխրանքների, միասնության ու համախմբվածության խորհրդանիշ: Հաղթանակի տոնը մեզ համար կրկնակի խորհուրդ ունի, քանզի մենք նշում ենք ոչ միայն ֆաշիզմի դեմ տարած Մեծ հաղթանակի օրը, այլև մեկ այլ փառավոր տարեդարձ` Շուշիի ազատագրման 25 ամյակը: Իրենց պապերի ու հայրերի արժանավոր ժառանգներն այսօր էլ շարունակում են հերոսական պայքարով, իրենց կյանքի գնով պաշտպանել մեր հայրենիքը: Մեր խոնարհումն ենք բերում Արցախյան հերոսամարտում եւ դրանից հետո նահատակված մեր քաջորդիների շիրիմների առջև: Փառք ու պատիվ բոլոր նրանց., ովքեր իրենց կյանքը նվիրաբերեցին հայրենիքի պաշտպանությանն ու ազատությանը»,-նշեց Հովսեփ Սիմոնյանը:
Ներկաներին նաև ողջունեց և շնորհավորեց Գյումրու քաղաքապետ Սամվել Բալասանյանը:
Շնորհավորական ելույթներից հետո տեղի ունեցավ Հայաստանի զինված ուժերի՝ ՀՀ ՊՆ Շիրակի կայազորի և Գյումրիում տեղակայված 102-րդ ռազմաբազայի և սահմանապահ ջոկատի զինվորների համատեղ շքերթը:
