ԵՐԵՎԱՆ, 14 մայիսի — Sputnik. ՀՀ մարդու իրավունքների պաշտպանի աշխատակազմում մանրամասն ուսումնասիրվել են «Հանրապետական» կուսակցության քաղաքապետի թեկնածուի՝ Երևանի Ավան վարչական շրջանում գտնվող նախընտրական շտաբում Ազգային ժողովի պատգամավոր, «Երկիր Ծիրանի» կուսակցության քաղաքապետի թեկնածու Զարուհի Փոստանջյանի մասնակցությամբ միջադեպն արձանագրած տեսանյութերը, ասված է ՄԻՊ գրասենյակի հաղորդագրության մեջ։ Հատուկ ուսումնասիրվել են Ոստիկանության ծառայողների գործողությունները միջադեպի ընթացքում։
«Այդ կապակցությամբ Մարդու իրավունքների պաշտպանի աշխատակազմը հայտարարում է, որ Ոստիկանության ծառայողները պարտավոր են հարգել մարդու իրավունքները, ցուցաբերել զսպվածություն ցանկացած քաղաքացու և հատկապես քաղաքական գործընթացի մասնակցի հետ շփման ընթացքում»,-ասված է հաղորդագրության մեջ։
Մարդու իրավունքների պաշտպանը կարծում է, որ Ոստիկանության ծառայողը պարտավոր է լինել հարգալից և անկողմնակալ:
Ոստիկանության ծառայողների գործողություններին վերաբերող բոլոր նյութերը Պաշտպանի աշխատակազմում ամփոփվել են և կուղարկվեն Ոստիկանություն՝ համապատասխան վարույթ սկսելու պահանջով:
