ԵՐԵՎԱՆ, 15 մայիսի-Sputnik. Հոգեբան Սամվել Խուդոյանը կարծում է, որ կարճ դադարով իրար հաջորդող երկու ընտրություն, բթացնում են մարդկանց և առաջացնում անտարբերության դրսևորումներ։ Այս գործոնը մի կողմ։ Հոգեբանի խոսքով` խորհրդարանական վերջին ընտրությունները ցույց տվեցին, որ վարչական ռեսուրսը մեծ թափով օգտագործվում է` ի պաշտպանություն իշխանական թևի։ Հետևաբար, հուսահատության ալիքը քաղաքապետի ընտրության հարցում ավելի խորացավ։
«Անարդար ընտրություններ էին։ Ես չեմ ասում` կեղծեցին, լցոնումներ արեցին։ Իշխանական ամբողջ ռեսուրսն օգտագործվում էր տվյալ մարդու ընտրության համար։ Պետք չէ լուրջ սոցիոլոգիական հետազոտություններ անել, որպեսզի այսքանը հասկանաս»,-ասաց հոգեբանը։
Այն, որ իշխանությանը շատերն են դեմ, բայց գնում ու քվեարկում են իշխանության թեկնածուի օգտին, հոգեբանին ստիպում է բժշկական ախտորոշում տալ` մազոխիզմ։
«Բոլորն իշխանությունների դեմ են, իշխանություններն էլ են ասում, որ ամեն ինչ վատ է։ Բայց քաղաքացիներն ընտրում են այդ իշխանություններին։ Այսինքն` մազոխի՞զմ է սա, ինչ է»,-ասաց նա։
Նրա կարծիքով` հոգեբանական տեսանկյունից ամենագրագետ քարոզարշավը տարավ Նիկոլ Փաշինյանը։ Տարոն Մարգարյանի քարոզարշավը նրա համար անհետաքրքիր էր։ Իսկ Զարուհի Փոստանջյանին շատ է հարգում, բայց էմոցիոնալ տեսանկյունից` ճիշտ չի համարում։
«Կա տրամաբանորեն ընդդիմադիր և հուզականորեն ընդդիմադիր գործիչ։ Նա հուզականորեն էր ընդդիմադիր։ Նա, կարծես, պայքարում էր իր համար ատելի մարդու դեմ։ Նա իր ընտանիքին էլ էր վտանգի տակ դնում։ Փոստանջյանն առաջին անգամ չէ, որ ցույց տվել` կարող է շատ բաց, էմոցիոնալ խոսել։ Եվ դա դուր չէր գա մարդկանց, նա երբեք չէր ընտրվի։ Այդ կարգի էմոցիոնալ հակազդումները լավ չեն ազդում»,-ասաց հոգեբանը։
«PR-ի զարգացման հայկական կենտրոնի» նախագահ Հայկ Կիրակոսյանն էլ ընտրությունների ամենազավեշտալի մասը համարում է մասնակցության պրոցեսը։
«Մասնակցությունը հուշում է, որ ընտրողները լայն հաշվով ընտրական համակարգին չեն հավատում։ Նրանք հասել են այն մակարդակին, որ գիտակցում են` ընտրությունները խիստ կառավարելի գործընթաց են, և, բնականաբար, կառավարողն էլ հենց որոշում է ընտրությունների արդյունքները»,-ասաց նա։
Նրա խոսքով` մեզ համար հետաքրքիր պետք է լիներ ոչ թե ընտրողների թիվը հաշվելն, այլ մտահոգվելը, թե հատկապես հասարակության որ շերտը չի մասնակցել քվեարկությանը։
«Ընտրության արդյունքը ես չեմ կապում քարոզարշավի հետ, որովհետև քարոզարշավի առկայության պարագայում ընտրողների պատկերը կարող էր որոշ չափով այլ լիներ, սա խայտառակ պատկեր է»,-ասաց PR մասնագետը։
Հայկ Կիրակոսյանը վերահաստատեց հոգեբան Սամվել Խուդոյանի այն կարծիքը, որ լայն թափով կիրառվել է վարչական ռեսուրսը։ Հետևաբար, ունենք մի պատկեր, որը կանխատեսելի էր։
