ԵՐԵՎԱՆ, 16 մայիսի-Sputnik. «Դալան» ցուցասրահում այսօր կարելի էր տեսնել բազմաթիվ ու բազմազան լուսանկարներ, որոնք ներկայացվել են «Ավրորա» լուսանկարչական մրցույթին։ Գլխավոր չափանիշը հումանիզմը հնարավորին չափ արտահայտիչ ներկայացնելն էր։ Ժյուրիի անդամ Զավեն Խաչիկյանը, սակայն, այնքան էլ գոհ չէր արդյունքներից, կարծում է, որ «Ավրորան» ավելի բարձր նշաձող է սահմանում։
«Լուսանկարչական որակն «Ավրորայի» որակին զիջում է։ Դա իմ սուբյեկտիվ կարծիքն է։ Պետք է շատ աշխատել, և դա բոլորիս է վերաբերում։ Ես կողմ էի, որ տարիքային ցենզ չդրվեր, 40-ից բարձր նաև լինեին, որովհետև մարդասիրական գաղափարներին ավելի հասուն տարիքում են հասնում։ Երևի թե, դա զգացնել տվեց այս մրցույթում»,- ասաց Զավեն Խաչիկյանը։
Ինչ վերաբերում է կարճամետրաժ ֆիլմերին, ապա այս ոլորտում ժյուրիի նախագահ Էդգար Բաղդասարյանը ևս կարծում է, որ աշխատելու տեղ կա և հույս հայտնեց, որ հաջորդ տարի արդյունքն ավելի գոհացնող կլինի։ Ի՞նչն եք առավել կարևորել լավագույնին ընտրելիս, չէ՞ որ տեղեկատվական տեխնոլոգիաների զարգացման դարաշրջանում կարելի է հեռախոսով ֆիլմ նկարել` միաժամանակ ներդնելով հզոր գաղափարախոսություն. Sputnik Արմենիայի հարցին, Էդգար Բաղդասարյանը դրական պատասխան տվեց։
«Շատ լավ բան եք ասում։ Ուսանողներս, երբ ասում են` սա է պետք, նա է պետք, դրամ է պետք, ես ասում եմ` ոչ մի բան պետք չի։ Ես էլ կուզեմ 200 միլիոնանոց բյուջեով ֆիլմ նկարել, բայց կարևորը գաղափարն է, որովհետև թվային տեխնոլոգիաները էժանացրին պրոցեսը։ Ես հաճախ եմ ասում` բոլորիդ տանը դրված է A4 ֆորմատի թուղթ, բայց ոչ բոլորն են գրող։ Այնպես որ, խնդիրը ոչ թուղթ ու գրչի, ոչ էլ կրիչի մեջ է, այլ ճաշակի և բնատուր շնորհքի»,- ասաց ռեժիսորը։
Եվ վերջապես, բաղձալի պահը մոտեցավ։ Ովքե՞ր են մյուսներից առավել հաղորդակից դարձել մարդասիրական արժեքներին իրենց լուսանկարներով ու կարճամետրաժ ֆիլմերով։
«Վերջապես հանգիստ». սա այն լուսանկարն է, որը ժյուրիի որոշմամբ ճանաչվեց լավագույնը։ Լուսանկարն արվել է Արցախի հյուսիսային սահմանին ապրիլյան պատերազմի օրերին և պատկերում է հայ զինվորին՝ որպես մարդասիրության խորհրդանիշ։ Հաղթող լուսանկարի հեղինակը ստացավ 2500 ԱՄՆ դոլար, և որ առավել կարևոր է` բուռն ընդունելություն ու լիքը ծափեր։
«Մոտ 2 ամիս ապրել եմ Արցախում, ապրիլյան պատերազմի օրերին։ Սկզբում լուսանկարչական ապարատ չունեի, որովհետև զինվոր էի։ Հետո ձեռք բերեցի այն։ Հերթական գիշերներից մեկն էր, երբ մի քիչ ժամանակ էինք ունենում քնելու, ով որտեղ կարողանում՝ քնում էր։ Այս լուսանկարով ուզում եմ ցույց տալ, որ ծայրահեղ իրավիճակում անգամ պահպանվում էր մարդկությունը, լուսավոր ու բարի գծերը»,-ասաց լուսանկարի հեղինակ Արեգ Բալայանը։
«Ավրորա» կարճամետրաժ ֆիլմերի մրցույթում էլ լավագույնը ճանաչվեց Մարիա Ֆերնանդա Մորենո Բելտրանի «Ցանկություն» անիմացիոն ֆիլմը Կոլումբիայից։ «Ավրորա» մարդասիրական նախաձեռնությունը հաղթող ֆիլմի հեղինակին պարգևատրեց 4000 ԱՄՆ դոլարով։
«Մեզ միացան աշխարհի 50-ից ավելի երկրների հազարավոր տաղանդավոր երիտասարդներ`ներկայացնելով մարդասիրության և երախտագիտության գաղափարների շուրջ սեփական պատկերացումները»,- ասաց մրցույթների ժյուրիների անդամ և «Ավրորա» մարդասիրական նախաձեռնության գործադիր տնօրեն Արման Ջիլավյանը։
Տեղեկացնենք, որ «Ավրորա» լուսանկարչական և կարճամետրաժ ֆիլմերի մրցույթները մեկնարկել էին 2016 թվականի դեկտեմբերին։ Մրցույթներին ներկայացվել է 1237 լուսանկար` 48 երկրից և 184 ֆիլմ` 27 երկրից։
