ԵՐԵՎԱՆ, 23 մայիսի — Sputnik. ՀԱՊԿ-ի Արագ արձագանքման հավաքական ուժերի (ԱԱՀՈՒ) զինման շրջանակում Ռուսաստանից Հայաստան մատակարարվող սպառազինությունը կբարձրացնի Հայաստանի և ընդհանրապես տարածաշրջանի անվտանգությունը, Sputnik Արմենիա մամուլի կենտրոնում ասաց ՀԱՊԿ ինստիտուտի տնօրեն Նվեր Թորոսյանը։
Ինչ վերաբերում է վերջին հայտարարությանը` ուղղաթիռների, ՀՕՊ-ի և զրահատեխնիկայի մատակարարման վերաբերյալ, ապա նրա խոսքով` այն պետք է մատակարարվեր 2015-2016 թթ., սակայն ճգնաժամի պատճառով դա տեղի չունեցավ։
«Բարեբախտաբար, այդ մատակարարումը 2018-2019 թթ —ին իրականացնելու վերաբերյալ նախնական պայմանավորվածություն արդեն կա»,- ասաց Թորոսյանը։
Նա նշեց, որ դեռ վաղ է խոսել այն մասին, թե այդ տեխնիկան անմիջապես ում է ենթարկվելու, սակայն ակնհայտ է, որ գտնվելու է Հայաստանում և պահպանելու է երկրի անվտանգությունը։
«Մենք ևս մեկ քայլ կանենք մեր անվտանգությունն ապահովման ուղղությամբ», — ընդգծեց Թորոսյանը։
Նրա խոսքով` հնարավոր է` այդ տեխնիկան տրամադրվի ոչ թե ներքին գներով, այլ անհատույց։
Ավելի վաղ Ռուսաստանի ռազմատեխնիկական համագործակցության դաշնային ծառայության տնօրեն Դմիտրի Շուգաևն ասել էր, որ 2017 թվականին Ռուսաստանը կշարունակի Հայաստանին ռազմական տեխնիկա մատակարարել։ Խոսքը վերաբերում է, առաջին հերթին, ավիացիոն տեխնիկային, մասնավորապես` ուղղաթիռներ, ՀՕՊ համակարգեր և զրահատեխնիկա։
Միաժամանակ ՀԱՊԿ գլխավոր քարտուղարի տեղակալ Վալերի Սեմերիկովն ասել էր, որ ՀԱՊԿ արագ արձագանքման հավաքական ուժերի ազգային միավորումներին անհատույց հիմունքներով սպառազինություն մատակարարելու վերաբերյալ ծրագրի իրականացումը կարող է վերսկսվել մոտակա տարիներին։
Ավելի վաղ Երևանը հայ-ռուսական պայմանագրի շրջանակում 200 մլն դոլարի վարկ էր ստացել զենք գնելու համար։ 2015 թվականին ստորագրված համաձայնագրով նախատեսվում էր ռուսական արտադրության ռազմամթերք գնել։ Համաձայնագիրը ստորագրվել է դեռևս 2015 թվականի հունիսի 25-ին, սակայն ուժի մեջ է մտել միայն 2016 թվականի փետրվարի 10-ին։
