Հրապարակ. «Օպտիմալացում ԱԺ-ում»
Թերթը գրում է, որ Ազգային ժողովում մեկնարկել է աշխատակազմի օպտիմալացումը։
«ԱԺ նոր ղեկավարությունը ձեռնամուխ է եղել աշխատակազմի օպտիմալացմանը։ Աշխատակազմի ղեկավար Արա Սաղաթելյանը զարմանքով տեղեկացել է, որ ԱԺ նախագահն ունի 23 օգնական ու խորհրդական։ Վերջին նախագահներից ամեն մեկն իր օգնականներն ու խորհրդականներն է բերել, բայց աղմուկից խուսափելու համար նախկիններին ձեռք չի տվել։ Առաջին կրճատվողները լինելու են նրանք»,-գրում է թերթը։
Առավոտ. «Էկոպայուսակները` այլընտրանք «անմահ աղբին»»
Սևանի ավազանի Ֆաունայի և Ֆլորայի միջավայրում պոլիէթիլենային տոպրակների քանակը նվազեցնելու և այդ վնասակար ազդեցությունը քչացնելու նպատակով Սևան համայնքի ավագանու անդամ Արթուր Մելքոնյանը Սևանում ծրագիր կիրականացնի։
«Արթուր Մելքոնյանի խոսքով`ծրագրի առաջին նպատակը հասարակության և շրջանում պոլիէթիլենային տոպրակների վնասակար ազդեցության վերաբերյալ իրազեկվածության բարձրացումն է, ինչպես նաև միջոցառումների միջոցով թղթե և կտորե տոպրակների օգտագործման տարածումը. «Ծրագրի կարևորությունն այս տարածաշրջանում առավել քան ընդգծված է` հաշվի առնելով Սևանա լճի ափերին տոպրակների կուտակումները, դրանց վնասակար ազդեցությունը։ Ծրագիրն իրականացվելու է դրամաշնորհի միջոցով։ Արդյունքում ձեռք բերված կարի և ասեղնագործ մեքենաներն առաջին փորձնական արտադրանքն են տալիս։ Ըստ ծրագիրն իրականացնողների` նորաձև, տարբեր լոգոներով և տարբերանշաններով տոպրակները դառնալու են մարդկանց ձեռքի անբաժան աքսեսուարը»»,-գրում է թերթը։
Իրավունք. «Քաղաքական զարմանք»
Թերթը գրում է, որ քաղաքագետ Սուրեն Սարգսյանը ժամանակ առ ժամանակ հայերեն է թարգմանում գաղտնազերծած դիվանագիտական փաստաթղթերը և զարմանալի մանրամասներ բացահայտում։
«Սակայն ամենազարմանալի բացահայտումը նա արել է վերջերս։ Պարզվում է, որ մազութային սուլթանատին մշտապես զորակցող Պակիստանը, որն իբր չի ճանաչել ՀՀ անկախությունը, իրականում լավ էլ ճանաչել է։ Պակիստանը ճանաչել է Հայաստանի Հանրապետությունը որպես պետություն 1992 թվականի մարտի 2-ին, երբ ՄԱԿ-ի գլխավոր Ասամբլեայի թիվ A/RES/46/227 բանաձևին (բանաձևը վերաբերում է Հայաստանի ՄԱԿ-ին անդամակցելուն) դեմ չի եղել, որի հետևանքով բանաձևն ընդունվել է առանց քվեարկության` անդամ-երկրների կոնսեսուսով։ Այսինքն` Պակիստանը կարող էր պահանջել քվեարկություն և դեմ քվեարկել Հայաստանի մասնակցությանը, սակայն չի արել։ Պակիստանը ճանաչել է Հայաստանը որպես ՄԱԿ-ի լիիրավ անդամ, հետևաբար` անկախ պետություն։ Մնացած ամեն ինչ ադրբեջանահաճո պոպուլիզմ է»,-գրում է թերթը։
Հայկական ժամանակ. «Վրդովված են»
ԱՄՆ-ում Թուրքիայի դեսպանը կանչվել է պետքարտուղարություն` քննարկելու նախագահ Էրդողանի վաշինգտոնյան այցի դեմ բողոքող խաղաղ ցուցարարների հանդեպ բռնության դեպքը։ Այս մասին հայտարարել է ԱՄՆ պետքարտուղար Ռեքս Թիլերսոնը։
«Ընթանում է քննություն։ Մենք կսպասենք և կտեսնենք, թե ինչ է պարզելու քննությունը։ Բայց մենք հայտնել ենք Թուրքիայի դեսպանատան դիմաց տեղի ունեցածի վերաբերյալ մեր վրդովմունքը»,-Foxnews հեռուստաընկերությանը տված հարցազրույցում ասել է Թիլերսոնը։ Նա նշել է, որ պետքարտուղարությունը տեղի ունեցածն ուղղակի անընդունելի է գնահատել»,- գրում է թերթը։
