ԵՐԵՎԱՆ, 26 մայիսի — Sputnik. Հայաստանի Հանրապետությունում Ռուսաստանի ԱԴԾ-ի Սահմանապահ վարչության Արմավիրի սահմանապահ ջոկատը 2017 թվականի մայիսի 26-ին նշում է 93-ամյակը, հայտնում է Հայաստանում Ռուսաստանի ԱԴԾ-ի սահմանապահ վարչության մամուլի ծառայությունը։
Արմավիրի սահմանապահ ջոկատը սահմանապահ ծառայության համակարգում հնագույներից է։ Այն հսկում է Հայաստանի և Թուրքիայի պետական սահմանի 127 կմ երկարությամբ հատվածը։ Ջոկատի սահմանապահները հպարտանալու առիթ ունեն. իրենց շարքերում ծառայել են Խորհրդային Միոթյան երեք հերոս, որոնց թվում է եֆրեյտոր Ալեքսանդր Կորյակովը, որն իր կյանքի գնով կանգնեցրել է ավազակների խմբի առաջընթացը դեպի երկրի խորքը», — ասված է հաղորդագրության մեջ։
1958 թվականի մայիսի 30-ին ԽՍՀՄ նախարարների խորհուրդը Արմավիրի սահմանապահ ջոկատի 11-րդ ուղեկալին եֆրեյտոր Ալեքսանդր Կորյակովի անունը շնորհելու որոշում էր կայացրել (ներկա պահին սահմանապահ ուղեկալը մտնում է Արտաշատի սահմանապահ ջոկատի կազմի մեջ)։
«Մի քանի անգամ ջոկատը Հայաստանի սահմանապահ ջոկատների շարքում լավագույնն է ճանաչվել, իսկ 2002 թվականին ճանաչվել էր լավագույնը` Ռուսաստանի Դաշնության ամբողջ սահմանապահ ծառայությունում։ Օպերատիվ-ծառայողական գործունեության գրեթե մեկդարյա պատմության ընթացքում սահմանապահ ջոկատի զինծառայողները ձերբակալել են պետական սահմանը խախտած ավելի քան 1200 մարդու և ավելի քան 70 հազար սահմանապահ ռեժիմը խախտածների։ Ներկա պահին պետական սահմանն ու սահմանային ռեժիմը խախտելու հազվադեպ փորձեր են գրանցվում, սակայն այնուամենայնիվ, ջոկատի սահմանապահները չեն կորցնում զգոնությունը և ցանկացած պահի պատրաստ են օպերատիվ կերպով արձագանքելու իրավիճակի փոփոխմանը», — գրված է հաղորդագրության մեջ։
Անձնակազմի հետ պարբերաբար անցկացվում են հավաքներ, ուսումնամեթոդական պարապմունքներ։ Զինծառայողները պարբերաբար գնում են կրակելու, մասնակցում տակտիկական զորավարժություններին։ Սահմանապահ ջոկատի ղեկավարության հիմնական ջանքերը կենտրոնացած են պետական սահմանը պայմանական խախտողների որոնման և ձերբակալման պրակտիկ պարապմունքների մշակման վրա։
ՀՀ-ում Ռուսաստանի ԱԴԾ սահմանապահ վարչության պետ գեներալ-լեյտենանտ Անատոլի Միխեևը շնորհավորական խոսքում նշել էր, որ Արմավիրի ջոկատի սահմանապահները գործով են ապացուցում Հայաստանի Հանրապետության պետական սահմանի պահպանմանն ուղղված իրենց պրոֆեսիոնալիզմն ու զգոնությունը։
Թուրքիայի (330 կմ) և Իրանի (45 կմ) հետ Հայաստանի պետական սահմանի պահպանումը իրականացնում է Ռուսաստանի ԱԴԾ սահմանապահ վարչությունը։ Հայաստանում Ռուսաստանի ԱԴԾ սահմանապահ վարչության մեջ մտնում են չորս սահմանապահ ջոկատներ, որոնք տեղակայված են Գյումրիում, Արմավիրում, Արտաշատում և Մեղրիում, ինչպես նաև առանձին հսկիչ անցակետեր Երևանի «Զվարթնոց» միջազգային օդանավակայանում։
