ԵՐԵՎԱՆ, 28 մայիսի — Sputnik. ՀՀ նախագահ Սերժ Սարգսյանը Առաջին հանրապետության օրվա կապակցությամբ այցելեց «Սարդարապատ» հուշահամալիր, որտեղ հանդես եկավ ելույթով:
«Մայիսյան հերոսամարտերով մեր նախնիներն նվաճեցին ապրելու իրավունքը: Այդ անհավանական թվացող սխրանքը գործեցին մեր ժողովրդի բոլոր խավերը, բոլոր շերտերը: Գործեցին բացառիկ միասնականությամբ և կազմակերպվածությամբ, անձնազոհ խիզախությամբ և աննահանջ կամքով», — ասաց Սարգսյանը:
Նա նշեց, որ նորանկախ Հայաստանը ծնվեց Առաջին աշխարհամարտի համազարկերի տարափի տակ, ինչն ավելի արժեքավոր է դարձնում հայկական պետականությունը:
«Մենք ամեն տարի հավատարմության երդման նման կրկնում ենք մի պարզ ճշմարտություն. չլիներ 1918 թվականի մայիսի 28-ը, չէր լինելու Խորհրդային Հայաստանը, և չէր լինելու ներկայիս Հայաստանի Հանրապետությունը:
Հայ ժողովրդի ողջ պատմության ընթացքում մենք, թերևս, չենք ունեցել պետականությունից զրկված լինելու ավելի մեծ ժամանակահատված, քան այն փուլը, որն անմիջականորեն նախորդել է մայիսի 28-ին: Եվ, անկասկած, չենք ունեցել ավելի ծանր և ողբերգական ճակատագիր նախորդ որևէ դարաշրջանում: Ահա թե ինչու 99 տարի առաջ պետականության վերականգնումը կրկնակի թանկ էր և նվիրական, և այսօր էլ սրբազան է յուրաքանչյուր հայի համար», — ասաց նախագահը:
Նա նշեց, որ այսօրվա Հայաստանը նույնպես «ծնվեց պատերազմի կրակի բովում, բայց այս անգամ՝ արցախյան ճակատում»: «Մենք՝ ներկա Հայաստանի քաղաքացիներս, հավատարիմ ենք Առաջին Հանրապետության պատգամներին», — եզրափակեց իր խոսքը Սարգսյանը:
Հանդիպումից հետո տեղի ունեցավ ուժային կառույցների` Ոստիկանության և ՊՆ-ի, ներկայացուցիչների հանդիսավոր շքերթը: Որից հետո ՀՀ նախագահն ու Ամենայն հայոց կաթողիկոս Գարեգին Բ-ն և այլ բարձրաստիճան պաշտոնյաներ ծաղկեպսակներ ու ծաղիկներ դրեցին Սարդարապատի հուշահամալիրի մոտ:
1918 թվականի մայիսին հայ ժողովուրդը հերոսական հաղթանակ տարավ Սարդարապատի, Բաշ-Ապարանի և Ղարաքիլիսայի ճակատամարտերում թուրք զավթիչների նկատմամբ: Հենց այս հաղթանակները թույլ տվեցին հայ ժողովրդին կերտել սեփական պատմությունը: Որպես Սարդարապատի հերոսամարտում հայ ժողովրդի տարած հաղթանակի խորհրդանիշ՝ ճակատամարտի վայրում 1968 թվականին կառուցվեց «Սարդարապատ» հուշահամալիրը:
