ԵՐԵՎԱՆ, 7 հունիսի — Sputnik. Դերսիմցի Շանթ Թայլանն այն հայ երիտասարդներից է, որոնք վերագտել են իրենց ազգային ինքնությունը, մկրտվել, հայկական անուն ստացել ու նպաստում են, որ մեր բռնազավթված պատմական հայրենիքում հայկական հետքը պահպանվի և վերականգնվի։ Դա շատ դժվար աշխատանք է Թուրքիայի պես բռնատիրական երկրում, որտեղ հայապահպանությանն ուղղված յուրաքանչյուր քայլ ճնշվում է, սակայն համարձակ երիտասարդը չի ընկրկում։
«Մասնագիտությամբ հաշվապահ եմ, ծնողներս հողատարածք ունեն Դերսիմում, որով վաստակում են հանապազօրյա հացը։ Ես արձանագրում, լուսանկարում եմ հայկական ամեն ինչ, որ գտնվում է մեր տարածքում»,- Sputnik Արմենիա մուլտիմեդիոն կենտրոնում ասաց Շանթը։
Նա հայրենասիրական մեծ աշխատանք է կատարում՝ փորձելով փրկել հայկական մասունքները։ Սեփական նախաձեռնությամբ մոտոցիկլետով շրջում է ամենուր, ուսումնասիրում տեղանքը, վեր հանում հայկականը և այդ ամենն՝ առանց որևէ մեկի աջակցության, հաճախ՝ կիսաքաղց ու հոգնած վիճակում։
Շանթ Թալյանը դեռևս լավ չի խոսում հայերեն, նրան օգնում է տարածաշրջանային հարցերով փորձագետ, վերլուծաբան Սարգիս Հացպանյանը, որի խոսքով՝ Շանթը մեկնել է Ստամբուլ տեղի հայկական կրթօջախներում հայերեն սովորելու, Հայաստանի Հանրապետությունը ճանաչելու համար։
«Դերսիմում շատ են հայերը, ալևիները, որոնց ծագումը նույնպես հայկական է, զազաները, որոնք հայ չեն, սակայն շատ հայամետ են։ Նրանք ամենաառաջինը կկանգնեն Հայաստանի թիկունքին, եթե վտանգ սպառնա մեր երկրին, սակայն այժմ անհրաժեշտ է, որ Դերսիմում հայապահպան գործունեության համար միջոցներ ներդրվեն։ Այնտեղ մեր հայրենակիցներին անհրաժեշտ է օգնել վերադառնալ արմատներին, ապրել՝ հայկական ավանդույթները պահպանելով, հայերեն խոսելով»,- ասաց Սարգիս Հացպանյանը։
Նա փոխանցեց Շանթի կարծիքը. այն է՝ հայ մնալու համար հարկավոր է հայերեն խոսել, քանի որ հայերեն խոսելը հայեցի մտածելակերպ է ձևավորում։
