ԵՐԵՎԱՆ, 7 հունիսի — Sputnik. Թեև «Իսլամական պետություն» խմբավորման գործողությունները կանխատեսել հնարավոր չէ, այնուհանդերձ ՀՀԿ խմբակցության ղեկավար Վահրամ Բաղդասարյանը տարածաշրջանում այդ կազմակերպության գործունեության ակտիվացման համար նախադրյալներ չի տեսնում։
Նշենք, որ այսօր առավոտյան զինված անձինք գրոհել են Իրանի խորհրդարանն ու Թեհրանի հարավում գտնվող իմամ Հոմեյնիի դամբարանը։
Պատգամավորի խոսքով` մեր ռազմավարական գործընկեր Իրանում յուրաքանչյուր նման երևույթ, կարող է որոշակի ազդեցություն ունենալ տարածաշրջանի վրա։
«Ցանկացած ահաբեկություն, նույնիսկ այն երկրներում, որոնց հետ մենք արտաքին քաղաքական ու տնտեսական առնչություն չունենք, բացասաբար է ազդում ամբողջ աշխարհի վրա։ Ցավում եմ, որ նման բան է տեղի ունենում Իրանում», – ասաց Բաղդասարյանը։
Իսլամական պետությունը, պատգամավորի խոսքով, անկանխատեսելի է, և որևէ երաշխիք չկա, որ տարածաշրջանի երկրները ամբողջովին պաշտպանված են նման իրադարձություններից։
Թեհրանի ահաբեկչության զոհերի թիվը հասել է 12–ի։ Իրանի արդարադատության նախարարության տվյալով` վիրավորվել է 39 մարդ։
Ահաբեկչության պատասխանատվությունը ստանձնել է «Իսլամական պետություն» ահաբեկչական խմբավորումը։ Իրանի իշխանությունները հայտարարել են, որ ահաբեկչությանը մասնակից բոլոր անձինք չեզոքացվել են։
