ԵՐԵՎԱՆ, 12 հունիսի — Sputnik. 1980-ական թվականներին, երբ Երևանում կառուցվում էր մետրոյի առաջին գիծը, նախատեսվում էր 2000–ականներին ունենալ 36 կայարան։ Այսօր երևանյան մետրոն ընդամենը 10 գործող կայարան ունի և 1 կիսավարտ ուղղություն, որի շինարարության մասին քննարկումները, որպես կանոն, ավարտվում են «փող չկա» պատճառաբանությամբ։
1982-90 թթ. Երևանի գլխավոր ճարտարապետի պաշտոնում աշխատած Գուրգեն Մուշեղյանն այսօր հերթական քննարկմանը համոզմունք հայտնեց, որ մետրոյի շինարարությունը դեպի Աջափնյակ այսօր էլ կարող է շարունակվել, քանի որ այս ուղղությամբ գործի կեսն արված է։
«Կարելի էր այս մետրոն շահագործման հանձնել, որովհետև այնտեղ շուրջ 100 մլն–ի ներդրում է կատարված, թունելները գրեթե ամբողջությամբ պատրաստ են։ Թունելներից բացի 6 հորան կա, որոնք ապահովում են շինարարության շարունակությունը և կարող են օգտագործվել հիմնական թունելների կառուցման համար»,– ասաց Մուշեղյանը։
Նա միաժամանակ հիշեցրեց, որ երբ տարիներ առաջ Ասիական զարգացման բանկը Աջափնյակ կայարանի շինարարությունը ֆինանսավորելու պատրաստակամություն հայտնեց, քաղաքային իշխանությունը պնդեց, որ այն պետք է կառուցվի ոչ թե համայնքի բանուկ հատվածում, այլ ֆիզիկայի ինստիտուտի տարածքում։ Այս հանգամանքն էլ առիթ դարձավ, որ բանկը հրաժարվեց պայմանագիր կնքելուց։
Տնտեսագետ Սուրեն Սարգսյանն էլ չի ընդունում իշխանությունների պատճառաբանությունը, թե մետրոյի շինարարությունը չափազանց թանկ հաճույք է, և Հայաստանը նման հնարավորություն չունի։ Նա առաջարկում է ստեղծել մետրոյի հիմնադրամ և բացի բարերարների փոխանցած գումարներից այնտեղ փոխանցել նաև երթևեկության տուգանքներից հավաքվող միլիարդավոր դրամների մի մասը։
«Մոտավոր հաշվարկով մետրոյի Աջափնյակ կայարանն ավարտին հասցնելու համար անհրաժեշտ է շուրջ 100 մլն դոլար»,– ասաց Սուրեն Սարգսյանը։
Գուրգեն Մուշեղյանի հաշվարկով, սակայն, այդ կայարանի շահագործումը նոր կառուցվողների համեմատ շատ ավելի էժան կարժենա։
Մետրոյի նոր կայարանների ու նոր ուղղությունների կառուցմանն այսօր, բանախոսների կարծիքով, խանգարում է ոչ այնքան գումարի բացակայությունը, որքան քաղաքային տրանսպորտի բիզնեսը, դրանից ստացվող հսկայական շահույթներն ու դրա հետ փոխկապակցված պաշտոնյաները։
Մյուս կողմից, քաղաքային իշխանությունը չի ցանկանում ստանձնել ծանր ու երկարատև շինարարության պատասխանատվությունը։ Երևանի մետրոպոլիտենը շահագործվում է 1981 թ.-ից, վերջին` «Չարբախ» կայարանը բացվել է 1996 թ. դեկտեմբերի 26-ին։ 2016 թ. –ին մետրոյով երթևեկել է 15 354 000 ուղևոր։
