ԵՐԵՎԱՆ, 21 հունիսի — Sputnik. Ի՞նչ քայլեր է ձեռնարկելու կառավարությունը կարկտահարությունից տուժած գյուղացիներին օգնելու համար: Այսօր Խորհրդարանում, օգտվելով կառավարության ղեկավարին հարց ուղղելու հնարավորությունից, հետաքրքրվեց ԱԺ Հանրապետական խմբակցության պատգամավոր Սեյրան Սարոյանը:
«Կարկուտը մոտ 11 համայնք ուղղակի ավերեց, 7 գյուղ ամեն ինչից զրկված է»,- ԱԺ-ում վարչապետին ասաց Սեյրան Սարոյանը:
Պատգամավորը կարևորեց գյուղացիներին աջակցություն տրամադրելու հարցը՝ նշելով, որ հակառակ դեպքում գյուղացիները ստիպված են լինելու արտագաղթել:
«Այդ գյուղերը ոչինչ չունեն, բանկերն այնպիսի վիճակում են դրել գյուղացուն, որ էլ երաշխավոր էլ չկա, որ բանկից նոր վարկ վերցնեն, բոլորը միմյանց երաշխավորել են»,- ասաց Սարոյանը:
Վարչապետ Կարեն Կարապետյանը տեղեկացրեց, որ կառավարությունում երեկ այդ հարցով խորհրդակցություն է հրավիրվել, հարցի քննարկումից հետ որոշվել է կարկտահարությունից տուժած համայնքներին աջակցություն տրամադրել:
Վարչապետը նաև հայտնեց, որ կառավարությունը նախատեսում է նոր հակակարկտային համակարգ ներդնել և զարգացնել ցանցային պաշտպանության համակարգը:
«Այն գյուղացիները, որոնք կներդնեն ցանցային համակարգ, կառավարությունը կֆինանսավորի նրանց ծախսերի մեծ մասը»,- ասաց վարչապետը:
Կարեն Կարապետյանի խոսքով՝ ամեն տարի կարկուտը Հայաստանի գյուղացիական տնեսություններին մոտ 12 մլն դոլարի վնաս է հասցնում: