ԵՐԵՎԱՆ, 23 հունիսի – Sputnik. Արարատի մարզի Ջրաշեն գյուղի բնակիչները փակել են ճանապարհը և հրաժարվել են ծիրանը վաճառել կրկնակի ցածր գնով։
Sputnik Արմենիան տեղեկություն է ստացել, որ Ջրաշենի գյուղացիներն այսօր փակել են գյուղի ճանապարհը և թույլ չեն տալիս, որ մեծածախ գնորդների բեռնատարները դուրս գան գյուղից, քանի որ երեկ նրանցից ծիրանը գնել են 800 դրամով, իսկ այսօր ուզում են 400 դրամով տանել:
Ջրաշենի գյուղապետ Արտյոմ Ղազարյանը Sputnik Արմենիայի հետ զրույցում հայտնեց, որ գյուղացիներն արդեն ուրիշ գնորդներ են գտել։
«Խնդիր կար. մեզանից ծիրանի կիլոգրամը 400 դրամով էին ուզում գնել, չնայած երեկ մենք վաճառում էինք կիլոգրամը 800 դրամով։ Բայց մենք այլ գնորդներ գտանք, որոնք 600 դրամ են վճարում, իսկ նախկին գնորդները դատարկ ձեռքով կվերադառնան», – ասաց Ղազարյանը։
Նա նշեց, որ նախորդ գնորդի հետ գների կտրուկ իջեցման մասին որևէ պայմանավորվածություն չի եղել։
