ԵՐԵՎԱՆ, 21 հուլիսի — Գոհար Սարգսյան, Sputnik. Շենգեն գոտու երկրներից շատերը մուտքի վիզաներ տրամադրելուց առաջ պահանջ են ներկայացնում՝ անձնագիրը երկարաձգված չլինի:
Ծրագրավորող Սոնա Հարությունյանը մասնագիտական նրբությունները ճամփորդելիս էլ կիրառեց. մի լավ ծրագրեց անելիքները Ֆրանսիայի դեսպանատուն դիմելուց առաջ: Առաջին հերթին փոխեց երկարաձգված ժամկետով անձնագիրը:
«Անձնագիրս հինգ տարով երկարաձգել էի, բայց պարզվեց, որ դրանով հեռու չեմ գնա»,-կեսկատակ պատմեց Սոնան:
Շուրջ տասն օրից ուժի մեջ կմտնի կառավարության որոշումը, որով հին նմուշի անձնագրերի վավերականության ժամկետը հինգ տարով երկարաձգելու դրույթը կհանվի:
Անձնագրերի և վիզաների վարչության պետ Մնացական Բիչախչյանը շտապեց տեղեկացնել՝ այն մարդիկ, ովքեր արդեն իսկ երկարաձգել են անձնագրերի ժամկետները, կարող են հանգիստ լինել, դրանք ուժը չեն կորցնի: Պարզապես ուղիղ տասն օրից ժամկետների երկարաձգում այլևս չի իրականացվի: Իսկ վերոնշյալ նախագիծը մշակելու և որոշումն ընդունելու համար մի քանի հիմնավոր պատճառներ կան:
«Քաղաքացիական ավիացիայի միջազգային կազմակերպության ստանդարտներով, իսկ Հայաստանն այդ կազմակերպության անդամ է, արգելվում է անձնագրի ժամկետները երկարաձգել և անձնագրերում որևէ կնիքով հավաստել ժամկետների երկարաձգում: Մեր երկրում պրակտիկայում խնդիրներ էին առաջանում, անձիք ներկայանում են որևէ երկրի դեսպանատուն, որպեսզի ստանան մուտքի վիզաները, այդ երկրները չէին տալիս մուտքի վիզաներ, եթե անձնագրերի ժամկետը երկարաձգված էր»,-պատմեց Բիչախչյանը:
Ընդ որում, նա շեշտեց՝ եթե անգամ այս որոշումը չկայացվեր, միևնույն է, Եվրոպա մեկնելու համար քաղաքացիները ստիպված էին լինելու այդ անձնագրերը փոխել ու նորը վերցնել:
Բացի այդ, ըստ հիմնավորման, տասնհինգ տարվա վավերականության ժամկետը նույնականացման խնդիրներ էր ստեղծում:
«Դա բավականին երկար ժամանակ է, որ անձի դեմքի ֆիզիոլոգիական փոփոխություններն այն աստիճան լինեն, որ հնարավոր չլինի նույնականացնել»,-ասաց Բիչախչյանը:
Անձնագրերի և վիզաների վարչության պետը տեղեկացրեց նաև, որ նույնականացման խնդիրներ հիմնականում առաջանում են միջին տարիքի մարդկանց մոտ, քանի որ նրանց ֆիզիոլոգիական փոփոխություններն առավել կտրուկ են լինում: Իսկ այս հանգամանքն առաջին հերթին խնդիրներ է առաջացնում սահմանային անցման կետերում:
Տեղեկացնենք, որ հուլիսի 20-ին ընդունված նախագծով կապահովվի կենսաչափական տվյալներով ու հին նմուշի անձնագրերի միատեսակ իրավակարգավորումների կիրառելիությունը:
