ԵՐԵՎԱՆ, 28 հուլիսի — Sputnik. Ադրբեջանական արտադրության որևէ ապրանքի ներմուծումը Հայաստան հայաստանյան օրենսդրությունը չի արգելում, բայց դրանք մինչ օրս Հայաստան են ներկրվում բացառապես անօրինական ճանապարհով։ Այսօր լրագրողների հետ հանդիպմանը, մեկնաբանելով տեղական շուկայում ադրբեջանական տարբեր ապրանքների հայտնվելու մասին ահազանգերը, ասաց ՍԱՊԾ Բուսասանիտարական հսկողության տեսչության պետ Արթուր Նիկոյանը։
«Մենք որոշակի սահմանափակում այս պահի դրությամբ չունենք, որ ասենք` արգելվում է Ադրբեջանից սննդամթերքի ներմուծումը, բայց և չունենք գեթ մեկ դեպք, երբ քաղաքացին օրինական ճանապարհով փաստաթղթեր ներկայացնի սահմանային պետական վերահսկողության սահմաններում և նրան թույլատրվի սննդամթերք ներմուծել»։,– ասաց Նիկոյանը։
Իսկ ապօրինի ներկրված ապրանքի իրացման համար տեսչության պետն առաջին հերթին մեղադրում է վաճառողներին, որոնք առանց համապատասխան փաստաթղթերի պատրաստակամություն են հայտնում իրացնել կասկածելի ծագմամբ ապրանքը։
Իսկ եթե ադրբեջանական ցանկացած ապրանք Հայաստան ներմուծվեր օրինական ճանապարհով, ենթարկված լիներ լաբորատոր փորձաքննության ու ապացուցված լիներ դրա անվտանգ լինելը, այն կարող էր օրինական հիմքերով իրացվել հայաստանյան ցանկացած վաճառակետում, վստահեցնում է ոլորտի պատասխանատուն։
