ԵՐԵՎԱՆ, 2 օգոստոսի — Sputnik. Շամիրամ գյուղում 4 մարդու սպանած և 8–ին վիրավորած անձին ոստիկանությունը շարունակում է փնտրել։ Գյուղում իրավիճակը համեմատաբար հանգիստ է։ Այս մասին Sputnik Արմենիային ասաց Շամիրամի գյուղապետ Մրազ Բրոյանը։
«Իրավիճակը գյուղում հիմա հանգիստ է։ Վիրավորներից 5–ը բժիշկների հսկողության տակ են` 3–ը Աստղիկ բժշկական կենտրոնում են, 2–ը` Աշտարակի հիվանդանոցում»,–ասաց Բրոյանը։
Կրակոցներ արձակած անձին գյուղապետն անձամբ չի ճանաչում, գյուղում տեսել է մի քանի անգամ, գիտի, որ նա Արմավիրի մարզից է։
«Աստղիկ» բ/կ–ից մեր զանգին ի պատասխան ասացին, որ 3 վիրավորն էլ դեռ գտնվում են վերակենդանացման բաժանմունքում։
Հիշեցնենք, որ երեկ` օգոստոսի 1–ին, 10.40-ին ոստիկանություն ահազանգ է ստացվել, որ Արագածոտնի մարզի Շամիրամ գյուղի գերեզմանատանը կրակոցներ են հնչել:
Մեկնած օպերատիվ խումբը պարզել է, որ անհայտ անձը մտել է գերեզմանատան տարածք և կրակ
բացել հավաքվածների վրա:
Կրակոցների հետևանքով զոհվել է 4 մարդ, վիրավորվել՝ 8-ը: Կրակողը դեպքի վայրից դիմել է փախուստի: Ոստիկանության ծառայողների ձեռնարկած միջոցառումներով պարզվել է նրա ինքնությունը:
Օգտագործվել է «Սայգա» տեսակի, օրինական գրանցված որսորդական հրացան: