ԵՐԵՎԱՆ, 8 օգոստոսի — Sputnik. Հարևան երկրներում, մասնավորապես՝ Թուրքիայում ամռան ընթացքում գրանցված կոկսակի վիրուսի համաճարակային իրավիճակը շարունակում է լարված մնալ: Վարակի դեպքեր են գրանցվում, հատկապես, թուքական հանգստավայրեր, ծովափնյա շրջաններ այցելող զբոսաշրջիկների շրջանում։ Մեծ է վարակի տարածվածությունը ուկրաինացի զբոսաշրջիկների շրջանում։ Այս երկրի արտաքին գործերի գերատեսչությունն արդեն հանդես է եկել Թուրքիա մեկնելուց ձեռնպահ մնալու մասին հայտարարությամբ։
Հայաստանի պետական գերատեսչություններից տարածաշրջանային վարակին այսօր արձագանքել է միայն առողջապահության նախարարությունը` ՀՀ քաղաքացիներին կոչ անելով Թուրքիա չայցելել։
Առողջապահության նախարարությունը հայտնում է, որ կոկսակի վիրուսով վարակի դեպքեր այս ամռանը գրանցվել են նաև Հայաստանում։ ՀՀ ԱՆ մամուլի խոսնակ Անահիտ Հայթայանը մեզ հետ զրույցում նշեց, որ վարակվածները հիմնականում երեխաներ են եղել։ Իսկ թե որքանով են վարակի դեպքերը կապված Թուրքիա այցելելու հետ, Հայթայանը դժվարացավ պատասխանել։
Առողջապահության նախարարությունը զգուշացնում է, որ վարակն արտահայտվում է մրսածության և աղեստամոքսային ախտանշաններով: Գաղտնի շրջանը տևում է 1-10 օր: Առավել մեծ ռիսկի խմբում են նորածինները, երեխաներն ու դեռահասները։
Վարակի մասին կասկածների դեպքում բժիշկները խորհուրդ են տալիս արագ դիմել մասնագետներին, քանի որ ժամանակին չբուժվելու դեպքում վիրուսը կարող է բարդությունների պատճառ դառնալ։
