ԵՐԵՎԱՆ, 28 օգոստոս — Sputnik. Կենտրոն և Նոր Նորք վարչական շրջանների ընդհանուր իրավասության դատարանում դատավոր Արշակ Վարդանյանի նախագահությամբ այսօր ընթացավ «Իգլայի» գործով դատական նիստը: Ամբաստանյալ Սամվել Բաբայանի պաշտպան Ավետիս Քալաշյանը երեք միջնորդություն ներկայացրեց դատարանին:
Առաջին միջնորդությունը վերաբերում էր գույքի արգելանքը վերացնելուն։ Պաշտպանի խոսքով՝ սեփականության վրա կալանք դնելն իրավաչափ չէ և խախտում է վերջինիս սեփականության իրավունքը:
«Գույքի վրա կալանք դնելու երեք հիմք կա` քաղհայց, դատական ծախսեր և գույքի հնարավոր բռնագրավում: Սամվել Բաբայանի դեմ քաղհայց չկա, գույքի բռնագրավում նախատեսված չէ: Ինչ վերաբերում է դատական ծախսերին, դեռևս օրինական ուժի մեջ մտած դատական ակտ չկա, որը կհիմնավորի, որ Սամվել Բաբայանը մեղավոր է»,- հիմնավորումներ ներկայացրեց Ավետիս Քալաշյանը:
Սամվել Բաբայանի պաշտպանի մյուս միջնորդությունն իր պաշտպանյալի տեսակցությունների և հեռախոսային խոսակցությունների վրա դրված արգելանքը վերացնելուն էր վերաբերում, իսկ երրորդը` վերաբերում էր Սամվել Բաբայանի խափանման միջոցը փոխելուն:
«Միջնորդում եմ խափանման միջոց կալանավորումը վերացնել և կիրառել ստորագրություն չհեռանալու մասին, կամ կիրառել գրավ, որովհետև կալանավորումը պահպանելն անհիմն է»,-ասաց փաստաբանը:
Դատարանը հեռացավ խորհրդակցական սենյակ: Վերադառնալուց հետո դատավորը հայտնեց, որ սեփականության վրա դրված կալանքը վերացնելու և խափանման միջոցը փոխելու վերաբերյալ միջնորդությունները մերժվել են: Բավարարվել է տեսակցությունների և հեռախոսային խոսակցությունների սահմանափակումը վերացնելու վերաբերյալ միջնորդությունը:
Դատական հաջորդ նիստը նշանակվել է սեպտեմբերի 4-ին:
Հիշեցնենք, որ 2017թ.–ի մարտի 22–ին Արցախի պաշտպանության նախկին նախարար Սամվել Բաբայանը ձերբակալվել էր։ Հայաստանի ԱԱԾ-ն հաղորդել էր Հայաստանի երկու քաղաքացիների ձերբակալության մասին, որոնց կասկածում են Վրաստանից «Իգլա» զենիթահրթիռային համալիր տեղափոխելու մեջ։
Դեպքի առթիվ 2017թ. մարտի 22-ին ՀՀ Ազգային անվտանգության ծառայության քննչական վարչությունում ՀՀ քրեական օրենսգրքի 235-րդ 2-րդ մասի (ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը) և 235.1-րդ հոդվածի 2-րդ մասի 1-ին կետի հատկանիշներով հարուցվել է քրեական գործ։
