ԵՐԵՎԱՆ, 30 օգոստոսի — Sputnik. ՀՀ պաշտպանության նախարար Վիգեն Սարգսյանը Մոնթե Մելքոնյանի անվան ռազմամարզական վարժարանի hոգաբարձուների խորհրդի նիստի ժամանակ տեղեկացրեց, որ այս տարի վարժարանն ավելի շատ սան ունի, քան նախորդ տարիներին։
«Երկար տարվա ընթացքում առաջին անգամ մենք մրցութային ընդունելություն ենք ունեցել` երեք դիմորդ մեկ տեղի համար: Վստահ եմ՝ հաջորդ տարի դիմորդների ավելի բարձր քանակ կունենանք»,- ասաց նախարարը։
Այս տարի վարժարանը կունենա 210 աշակերտ հանրապետության բոլոր մարզերից։ Վիգեն Սարգսյանը տեղեկացրեց, որ Մոնթե Մելքոնյանի անվան ռազմամարզական վարժարաններում ուսուցումը կատարելու է մանկավարժական արհեստավարժ կոլեկտիվը։
Նշենք, որ Մոնթե Մելքոնյանի անվան ռազմամարզական վարժարանի հիմնադրամի հոգաբարձուների խորհուրդն այսուհետև կղեկավարի ՀՀ պաշտպանության նախարար Վիգեն Սարգսյանը: Վիգեն Սարգսյանի թեկնածությունն առաջադրեց ՀՀ արդարադատության նախարար Դավիթ Հարությունյանը:
