ԵՐԵՎԱՆ, 31 օգոստոսի — Sputnik. Ռուսաստանում դատապարտված, այնուհետև Հայաստան տեղափոխված Հրաչյա Հարությունյանի պատժի կրման ձևի փոփոխությունը զուտ մարդասիրություն է՝ պայմանավորված մի քանի գործոնով, Sputnik Արմեիային ասաց իրավապաշտպան Ավետիք Իշխանյանը:
«Նախ այն, որ Հարությունյանն ակամա է հանցագործ դարձել, դիտավորություն չի եղել: Հետո Հայաստանում թարմ են նրան՝ խալաթով դատարանի դահլիճ բերելու և հիվանդ ժամանակ ցուրտ պատժախցում պահելու հիշողությունները»,- ասաց նա։
Իրավապաշտպանի խոսքով` էականն այնն է, որ Հարությունյանն արդեն ազատ ռեժիմով կապրի, և Հայաստանի իշխանություններն են տվել նրան այդ հնարավորությունը։
«Սա ցույց է տալիս, որ հումանիստական որոշումներ ևս կայացվում են»,- ասաց Իշխանյանը:
Հիշեցնենք, որ Հրաչյա Հարությունյանը ՌԴ Պոդոլսկի շրջանում ԿԱՄԱԶ մակնիշի մեքենայով բախվել էր մարդատար ավտոբուսին, ինչի հետևանքով 18 մարդ էր զոհվել:
Ռուսաստանի Դաշնությունում դատապարտված Հարությունյանը հուլիսի 20-ին տեղափոխվել է ՀՀ՝ «Դատապարտյալների փոխանցման մասին» 1983թ. եվրոպական կոնվենցիայով սահմանված կարգով պատժի մնացած մասը կրելու համար:
Նա մեղավոր էր ճանաչվել ՌԴ օրենսգրքի 264 (ճանապարհային երթևեկության և տրանսպորտային միջոցների շահագործման խախտման) և 327 (կեղծ փաստաթղթերի պատրաստում) հոդվածներով:
ՌԴ-ում նա դատապարտվել էր 6 տարի 9 ամիս ժամկետով ազատազրկման: Պատժի մնացած մասը՝ 2 տարի 8 ամիսը, կկրի Հայաստանում՝ բաց ռեժիմով: Սա ենթադրում է, որ նա ցերեկները կարող է աշխատել, տուն գնալ, ապրել ինչպես ազատ մարդը, բայց արդեն երեկոյան պիտի վերադառնա պատժի կրման վայր, այս դեպքում՝ «Նուբարաշեն» ՔԿՀ-ին հարակից շենք:
Հայաստանի քրեակատարողական վարչությունից տեղեկացանք, որ վերջին 6 ամիսների ընթացքում Հայաստան է տեղափոխվել 6 դատապարտյալ: Նրանցից միայն Հրաչյա Հարությունյանն է պատիժը կրելու բաց ռեժիմով:
