ԵՐԵՎԱՆ, 7 սեպտեմբերի — Sputnik. «Армения Туристическая»-2017 ամենամյա չորրորդ մրցանակաբաշխությունը կանցկացվի Երևանում սեպտեմբերի 9-ին։
«Միջոցառման նպատակն է` զարգացնել զբոսաշրջային ոլորտն, առանձնացնել և պարգևատրել այն կազմակերպություններին, որոնք քվեարկությամբ լավագույնն են ճանաչվել, բացահայտել ոլորտի ամենահաջող նախագծերը»,– հինգշաբթի Sputnik Արմենիա մուլտիմեդիոն մամուլի կենտրոնում ասաց մրցանակաբաշխության արարողության ղեկավար Անահիտ Գևորգյանը։
Նրա խոսքով` այս մրցանակաբաշխությունը խթան կհանդիսանա ընկերությունների գործունեության կատարելագործման համար, ինչը կնպաստի զբոսաշրջության զարգացմանն ընդհանուր առմամբ։
«12 անվանակարգ կա։ Մրցանակաբաշխությունը կվարեն Նազենի Հովհաննիսյանն ու Հայաստանի վաստակավոր արտիստ Սարգիս Նաջարյանը»,– ասաց նա։
«Армения Туристическая» ամսագրի տնօրեն Լիլիթ Հովհաննիսյանն, իր հերթին, ասաց, որ մրցանակաբաշխությունն ուղեկցվելու է Արմեն Հյուսնունցի Հայաստանի պետական ջազային և էստրադային նվագախմբի համերգային ծրագրով։
«Կհնչեն սիրված հին կատարումներ հայտնի ֆիլմերից, սակայն ժամանակակից մշակմամբ։ Հյուրերին խոստանում ենք անակնկալներով լի հաճելի երեկո։ Ելույթ կունենան հայկական էստրադայի հայտնի և սիրելի արտիստներ Մհեր Արմենիան, Վիգեն Հովսեփյանը, Գրիգոր Կյոկչյանը, Մարբեյը»,– ավելացրեց նա։
Ամսագրի գլխավոր խմբագիր Ռուբեն Փաշինյանը նշեց, որ սեպտեմբերի 9-ին լույս կտեսնի ամսագրի թարմացված տարբերակը։
«Հինգ տարուց ավելի է, ինչ ամսագիրը լույս է տեսնում, որոշակի փոփոխություններ են տեղի ունենում ժամանակ առ ժամանակ, առավել ևս, որ երկրում զբոսաշրջությունը զարգանում է»,– ասաց Փաշինյանը։
Նրա խոսքով` այսուհետ «Армения Туристическая»-ն ավելի ինտերակտիվ կդառնա։ Հայաստանի մասին իրենց կարծիքն են արտահայտելու մի շարք հայտնի մարդիկ, որոնք երկիր են այցելել վերջին շրջանում, ինչպես նաև նրանք, որոնց բախտ է վիճակվել այստեղ ապրել։
12 անվանակարգերի թվում են «Էքստրեմալ զբոսաշրջության տարվա նախագիծը», Ժողովրդական ավանդույթների պահպանման տարվա նախագիծը», «Տարվա զբոսավարը», «Տարվա թանգարանը», «Տարվա հյուրանոցը Արցախում», «Տարվա տրանսպորտային ընկերությունը», «Տարվա հյուրանոցը Հայաստանում» և այլն։
