Լաուրա Սարգսյան, Sputnik Արմենիա
Վրաստանի ԱԳ նախարար Միխայիլ Ջանելիձեի այցը փորձագետները դիտարկում են Բաքվում կայացած վերջին հանդիպման համատեքստում։ Այնտեղ կայացել է Թուրքիայի, Վրաստանի ու Ադրբեջանի ԱԳ նախարարների եռակողմ հանդիպումը։
«Տրամաբանական է, որ այդ հանդիպմանը հաջորդեց հայաստանյան այցը»,– Sputnik Արմենիային ասել է Վրաստանի հարցերով փորձագետ, Հայաստանի պետական կառավարման ակադեմիայի տարածաշրջանային հետազոտությունների կենտրոնի գիտաշխատող Ջոնի Մելիքյանը։
Նրա խոսքով` արտաքին գործերի նախարարի տարածաշրջանային ճանապարհորդությունը ցույց տվեց, որ Թբիլիսիի արտաքին քաղաքականությունը փոփոխությունների չի ենթարկվել։ Պաշտոնական Թբիլիսին հավատարիմ է 2012 թվականին ընդունված արտաքին քաղաքական կուրսին, որն ուղղված է հարևանների հետ համագործակցությանը։
Թբիլիսին ցույց տվեց, որ Վրաստանի, Թուրքիայի ու Ադրբեջանի արտաքին գործերի նախարարների ստորագրած «2017–2019 թվականների եռակողմ սեկտորային համագործակցության գործողությունների նախագիծը» Հայաստանի ու Վրաստանի համար խոչընդոտ չի դառնա։
Վրաստանի, Թուրքիայի ու Ադրբեջանի գործակցության նախագիծն այնպիսի ոլորտների է անդրադառնում, ինչպիսիք են տնտեսությունը, էներգետիկան ու քաղաքականությունը։ Նման հարցերի են անդրադարձել Երևանում երկկողմանի հանդիպման ժամանակ Հայաստանի ու Վրաստանի ԱԳ նախարարները։ Նալբանդյանն ու Ջանելիձեն ընդգծել են, որ վերջին մի քանի տարվա ընթացքում հայ–վրացական հարաբերություններն ամրացել են։
«Ձնհալը» Երևանի ու Թբիլիսիի հարաբերությունների մեջ սկսվեց 2012 թվականին երկրում իշխանության փոփոխումից հետո։ Վրաստանի երրորդ նախագահ Միխայիլ Սահակաշվիլիի ռազմավարական գործընկերության քաղաքականությանը հաջորդեց «Վրացական երազանքի» բարիդրացիական հարաբերութունների քաղաքականությունը, որը նրանք կիրառում են բոլոր հարևանների նկատմամբ։
Վրաստանի նախագահի անձնակազմի նախկին ղեկավար Պետրե Մամրաձեն հիշում է` ինչպիսի դիվանագիտական պատասխաններ էր տալիս Երևանը Սահակաշվիլիի հարձակումներին։
«Սահակաշվիլու օրոք տարիներ էին լինում, երբ նա նույնիսկ վիրավորական հայտարարություններ էր թույլ տալիս։ Հայաստանի ԱԳՆ–ն ու երկրի իշխանությունները սթափ ու հավասարակշռված պատասխաններ էին տալիս», – Sputnik Արմենիայի հետ զրույցում ասաց Մամրաձեն։
Նրա խոսքով` ներկա իշխանությունների օրոք, ինչպես նաև Էդուարդ Շևարդնաձեն նախագահության տարիներին, բարիդրացիական հարաբերությունների համար բոլոր պայմանները կան։ Նա ընդգծեց համակարգային շփումների հնարավորությունը։
Վրացի նախարարն այս տարի արդեն եղել է Հայաստանում երկօրյա պաշտոնական այցով։ Այն ժամանակ, ինչպես նաև այս անգամ, երկկողմանի հանդիպման քննարկման թեմաներից էր արցախյան խնդրի կարգավորումը։ Ջանելիձեի առաջին հայաստանյան այցը կայացել է 2016 թվականի մարտին։
