ԵՐԵՎԱՆ, 14 սեպտեմբերի — Sputnik, Լաուրա Սարգսյան. Armenia ավիաընկերությունը հայտարարել է նոր սակագնային քաղաքականության մասին։ Վորոնեժ, Թել Ավիվ և Մինվոդի ուղղություններով ավիատոմսերն ավելի մատչելի են դարձել։
«Ավիաընկերությունն աշնանային սեզոնի համար նոր սակագնային քաղաքականություն է գործարկում։ Այժմ մատչելի ավիատոմսերն ավելի շատ են»,– Sputnik Արմենիայի թղթակցի հետ զրույցում ասաց ավիաընկերության հասարակայնության հետ կապերի գծով փոխտնօրեն Գևորգ Խաչատրյանը։
Նրա խոսքով` այդ հանգամանքը կարող է ավելի շատ ուղևորների ներգրավել, որոնք առանց այդ էլ ամառային սեզոնին բավականին շատ էին։ Միայն հունիս-օգոստոս ամիսներին ընկերության օդանավերը մոտ 30 հազար ուղևոր են տեղափոխել այն դեպքում, երբ անցյալ տարի ուղևորահոսքը կազմել էր շուրջ 65 հազար մարդ։ Ամեն օր ավիաընկերության ինքնաթիռները 5-6 չվերթ էին իրականացնում։
Armenia ավիաընկերությունում նման «երիտասարդ» ընկերության համար դա մեծ ձեռքբերում են համարում։ Armenia-ն ներկա փուլում չվերթեր է իրականացնում նաև դեպի Վորոնեժ, Մինվոդի, Թել Ավիվ, Բեյրութ, ինչպես նաև չարտերային չվերթեր ունի դեպի Բաղդադ, Էրբիլ, Սալոնիկ: Ավիաընկերությունը մտադիր է կանոնավոր չվերթեր գործարկել նաև նոր ուղղություններով։
Armenia-ի ավիապարկում երկու ինքնաթիռ կա` Boeing 737-500, Boeing 737-700։ Ընկերությունն ունի 53 աշխատակից։
Ավիաընկերության հիմնադիրներն են Աշոտ Թորոսյանը (51 տոկոս բաժնետոմս), Թամազ Գաիաշվիլին (24 տոկոս) և Ռոբերտ Օգանեսյանը (25 տոկոս): Հայաստանն ազգային ավիափոխադրողից զրկվել է 2013 թվականին` «Արմավիա» ընկերության սնանկացումից հետո: Այնուհետև ավիաշուկայում հայտնվել է AirArmenia ավիաընկերությունը, որն էլ 2014 թվականի հոկտեմբերին, հայտնվելով սնանկացման եզրին, դադարեցրել է թռիչքները։ Այժմ հայկական շուկայում երկու հայկական ավիափոխադրող է գործում` Armenia և «Տարոն Ավիա»:
