ԵՐԵՎԱՆ, 17 սեպտեմբերի — Sputnik. Նախագահ Սերժ Սարգսյանն այսօր աշխատանքային այցով ժամանել է Թուրքմենստան՝ ներկա գտնվելու երեկոյան մայրաքաղաք Աշգաբատում կայանալիք Ասիական հինգերորդ խաղերի բացման պաշտոնական արարողությանը: Մինչ այդ նա հանդիպում է ունեցել Գուրբանգուլի Թուրքմենստանի նախագահի հետ: Այս մասին հայտնում է ՀՀ նախագահի մամուլի ծառայությունը։
Նախագահ Բերդիմուհամեդովը շնորհակալություն է հայտնել հայ պաշտոնակցին` հրավերն ընդունելու և Աշգաբատ ժամանելու համար:
Քանի որ Սերժ Սարգսյանը Թուրքմենստան էր ժամանել Ասիական հինգերորդ խաղերի բացման պաշտոնական արարողությանը ներկա գտնվելու համար, շոշափվել է նաև սպորտային թեմատիկան: Թուրքմենստանի նախագահը կարևորել է սպորտի և օլիմպիական շարժման դերը միջպետական կապերի ամրապնդման, ժողովուրդների միջև բարեկամության ու փոխըմբռնման հասնելու տեսանկյունից: Նախագահ Բերդիմուհամդովի համոզմամբ՝ դա կօգնի նաև ՄԱԿ-ին` հաջողությամբ կյանքի կոչելու կայուն զարգացմանը միտված համընդհանուր ռազմավարությունը:
Հանդիպմանը երկու երկրների ղեկավարները քննարկել են հայ-թուրքմենական հարաբերություններին և տարբեր ոլորտներում, այդ թվում` էներգետիկայի և տրանսպորտի, փոխգործակցության զարգացմանը վերաբերող հարցեր, անդրադարձել բարձր մակարդակով Երևանում կայացած վերջին հանդիպմանը ձեռքբերված պայմանավորվածությունների իրականացման ընթացքին:
Երկկողմ հանդիպումից հետո ՀՀ նախագահը, այլ երկրների պատվիրակությունների ղեկավարների հետ միասին, կհյուրընկալվի Թուրքմենստանի առևտրաարդյունաբերական պալատում, որտեղ Թուրքմենստանի նախագահի կողմից կկազմակերպվի ընդունելություն:
