ԵՐԵՎԱՆ, 19 սեպտեմբերի — Sputnik. 1500 հոգով հավաքվել ու ժողով անել, հետո առանց կոնկրետ արդյունքի հեռանալ, լավ փորձ չէ, Sputnik Արմենիայի հետ զրույցում ասաց Լիբանանի զբոսաշրջության նախարար Ավետիս Կիտանյանը, որը մասնակցում է Երևանում կազմակերպված Հայաստան–Սփյուռք համաժողովին:
Պարզվում է` Կիտանյանն ինքն է նախաձեռնել իր այցն ու հանդիպումները, մինչդեռ, ըստ նրա, պետք է հակառակը լիներ: Սփյուռքահայ քաղաքական գործիչը հայտարարում է՝ ժամանակն է, որ Հայաստանի իշխանություններն ավելի նախաձեռնող լինեն, և այն, ինչ խոսվում է այսպիսի համաժողովների ժամանակ, կոնկրետ ծրագրեր դարձնեն:
«Սփյուռքն այն աղբյուրը չէ, որից պետք է միայն գումար կամ ներդրումներ ակնկալել: Հսկայական է սփյուռքի ներուժը՝ կուտակված միջազգային փորձ, մտավոր կարողություններ, կապեր: Հենց սրանք պետք է օգտագործել Հայաստանում ամենատարբեր ծրագրեր իրականացնելու համար: Այ այսպիսի համագործակցությունն է, որ անպայման արդյունք է տալու»,- առաջարկեց Կիտանյանը:
Օրինակն իր ոլորտից է: Հայաստանը շատ է հետաքրքրում լիբանանցի զբոսաշրջիկներին, հատկապես քրիստոնյա արաբներին: Երևան-Բեյրութ օդանավերը գրեթե 90 տոկոսով լիքն են երկու ուողղություններով էլ: Կան նաև հաստատող թվային տվյալներ: Եթե 2012 թվականին Հայաստանից Լիբանան էր մեկնել 1350 մարդ, ապա այս տարվա առաջին ութ ամիսներին այս թիվը 10-ը հազարի է հասել:
Հայաստան այցելող լիբանանցիների վերաբերյալ կոնկրետ վիճակագրություն չկա: Բայց ըստ Ավետիս Կիտանյանի` նրանց հեշտությամբ կարելի է գրավել: Հայաստանը զբոսաշրջիկի համար հետաքրքիր է թե՛ ամռանը, թե՛ ձմռանը, հետաքրքիր և աշխատող ուղղություն կարող է լինել նաև բժշկական զբոսաշրջությունը:
Նշենք, որ Հայաստան-Սփյուռք համահայկական վեցերորդ համաժողովը մեկնարկել է սեպտեմբերի 18-ին: Համաժողովն անցկացվում է 4 ուղղությամբ՝ Հայաստանի զարգացման հիմնախնդիրներ, Հայաստանի Հանրապետության պաշտպանական քաղաքականության առանձնահատկությունները ժամանակակից մարտահրավերների պայմաններում, Արտաքին քաղաքականության օրակարգ, Հայապահպանության հիմնախնդիրներ:
Մեծ պատվիրակություններ են ժամանել ՌԴ-ից (259), ԱՄՆ-ից (213), Ֆրանսիայից (92), Լիբանանից (107), Սիրիայից (44), Իրանից (56), Արգենտինայից (35), Կանադայից, Թուրքիայից, Վրաստանից: Առաջին անգամ համաժողովին մասնակցում են Մալայզիայի, Թայլանդի, Սինգապուրի, Ճապոնիայի, Մեքսիկայի, Եթովպիայի, Սուդանի, Մյամարի համայնքների ներկայացուցիչներ:
Մասնակիցների 35 տոկոսից ավելին կանայք են, մոտ 20 տոկոսն են կազմում երիտասարդները:
