ԵՐԵՎԱՆ, 20 սեպտեմբերի — Sputnik. «Սասնա ծռերի» փաստաբաններն այսօր դատական նիստի ընթացքում որոշեցին լքել դատարանի դահլիճը։ Պատճառը նրանց որոշ գործընկերների բացակայությունն էր, ում դատական կարգադրիչները թույլ չտվեցին մուտք գործել դատարան։
Փաստաբան Մուշեղ Շուշանյանը դատական կարգադրիչների պահանջով հրաժարվել էր դատարկել գրպանն ու ներկայացնել գրպանում առկա դրամապանակը։
Պաշտպան Արայիկ Պապիկյանի պայուսակին մոտեցրած մետաղորսիչ սարքը ձայնային ազդանշան էր արձակել, որից հետո Պապիկյանը թեև պատրաստակամություն էր հայտնել դատարկել պայուսակի պարունակությունը, բայց կարգադրիչներն արգելել էին նրա մուտքը։
Փաստաբանների բացակայության հիմքով` դատավոր Արտուշ Գաբրիելյանը 3 անգամ հետաձգեց նիստը՝ 20 և 30-ական րոպեներով։
Դատարանում ներկա փաստաբանները ընդմիջման ընթացքում որոշեցին, ի նշան բողոքի, դարձյալ մեկօրյա գործադուլ հայտարարել։
«Գործադուլը մեկօրյա է և միայն այս դատական նիստի շրջանակներում»,- լրագրողների հետ զրույցում հայտնեց փաստաբան Լուսինե Սահակյանը։
Գործադուլին միացած 13 փաստաբանների ստորագրություններով կազմվեց նիստը հետաձգելու և փաստաբանների անարգել մուտքն ապահովելու միջնորդություն, որը ներկայացվեց դատարան։ «Արգելվեց մեր գործընկերների մուտքը դահլիճ»,- ասված էր միջնորդության մեջ։
Դատավորը, միջնորդությունը հրապարակելուց հետո հայտարարեց, որ դատական կարգադրիչների գործառույթները վերահսկելու իրավասություն չունի և որոշում կայացրեց փաստաբաններ Շուշանյանի և Պապիկյանի նկատմամբ կարգապահական տույժ կիրառելու համար դիմել ՀՀ Փաստաբանների պալատ։
