ԵՐԵՎԱՆ, 20 սեպտեմբերի — Sputnik. Գոհար Սարգսյան. Հայաստանն անցյալի, ներկայի ու ապագայի տունն է, Հայաստանը հայի հավաքական տունն է: Այս մասին իր ելույթում նշեց Հայաստան-Սփյուռք համաժողովին ներկա Արամ Ա կաթողիկոսը: Բայց այն խոսքերը, որ հնչեցին հետո, սարսռեցրին բոլորին:
«Հայաստանը զբոսավայր չէ, Հայաստանը բիզնեսի շուկա չէ, Հայաստանը անցագիր չէ, վայ մեզի, որ միայն այսպես պիտի մոտենանք Հայաստանին»,-ասաց Մեծի Տանն Կիլիկիո կաթողիկոսը:
Հայաստան եկած սփյուռքահայերն էլ մի կողմ դրեցին հայրենիք ժամանելու ռոմանտիկ կողմերը, խոսեցին իրատեսական, առանց խնդիրները թաքցնելու: Օրինակ` Կիպրոսի թեմի առաջնորդ Գերաշնորհ տեր Խորեն արքեպիսկոպոս Տողրամաջյանը պարզ ու շիտակ ասաց՝ սփյուռքահայերը կապերը խզում Հայաստանի հետ, և դրա համար ամեն մեկն իր պատճառն ունի:
«Մարդիկ, որոնք դուրս են գալիս Հայաստանից, տարբեր պատճառաբանություններ ունեն. ոմանք տնտեսական պատճառներ ունեն, ոմանք իրենց զավակներին բանակից են փախցնում ու չեն ցանկանում կապ պահել Հայաստանի հետ»,- ասաց Կիպրոսի հայ հոգևորականը:
Դժգոհում են նաև սփյուռքահայ գործարարները՝ հիմնականում մաքսային ընթացակարգերից:
Այս ամենն ի մի բերելով՝ լրագրողները դիմեցին ճեպազրույցի եկած վարչապետ Կարեն Կարապետյանին: Նա նշեց, որ սփյուռքահայեր կան, որոնք գալիս են Հայաստան ու կառավարությունից սպասում այն, ինչը ոչ մի այլ երկրից չեն պահանջում:
«Շատերն անհաջողակ լինելով բիզնեսի մեջ՝ քչերն են ընդունում, որ իրենք ռիսկը սխալ են հաշվարկել, և յուրաքանչյուրը մեղադրում է»,-ասաց վարչապետը:
Շարժա բանկի կառավարիչ Վարուժան Ներգիզյանը Sputnik Արմենիայի հետ զրույցում հայտնեց, որ դեմ է բոլոր ծայրահեղություններին: Միաժամանակ հաստատեց, որ սփյուռքահայերը մեծ պահանջներ ունեն Հայաստանից, պահանջկոտությունը վերագրեց մեծ նվիրմանն ու սիրուն:
«Ամեն մարդ ցանկանում է, որ ինչ-որ իրենն է, լավ լինի: Մենք ուզում ենք, որ Հայաստանը լավ, զարգացած լինի, բայց մոռանում ենք, որ Հայաստանը 26 տարվա երկիր է, 100 տարվա ռեժիմից դուրս եկած երկիր է»,-ասաց գործարարը:
Սփյուռքահայերը հեռացան թերևս վերջին հույսով, որ բոլոր քննարկված հարցերը իրատեսական հիմքեր կունենան: Համարում են, որ տնտեսական ու անվտանգության թեմաները հրատապ լուծումներ են պահանջում:
