ԵՐԵՎԱՆ, 12 հոկտեմբերի — Sputnik. Հայաստանի ատոմայի էլեկտրակայանի առաջին բլոկը դե ֆակտո չի շահագործվում, անվտանգության ու հուսալիության տեսանկյունից դրա շահագործումը նպատակահարմար չէ: ՀՀ կառավարության նիստի ժամանակ ասաց էներգետիկ ենթակառուցվածքների և բնական պաշարների նախարար Աշոտ Մանուկյանը։
«Ատոմակայանի առաջին էներգաբլոկի ապամոնտաժումն անհրաժեշտություն է»,- ասաց նա։
Ատոմակայանի առաջին էներգաբլոկը շահագործումից հանելու որոշման նախագծին կառավարությունը հավանություն տվեց։
Մանուկյանը հիշեցրեց, որ 1989 թվականին դադարեցվեց հայկական ատոմակայանի երկու էներգաբլոկների աշխատանքը, իսկ 1994 թվականին երկրորդ էներգաբլոկը վերագործարկվեց։
«Միջազգային բոլոր չափորոշիչներով` երկրորդ էներգաբլոկի հուսալիության ու անվտանգության մակարդակը գտնվում է ամենաբարձր հորիզոնականում։ Երկրորդ էներգաբլոկի վրա ծախսվել են տասնյակ միլիոնավոր դոլարներ: Սա Ատոմային էներգիայի միջազգային գործակալության փորձագետների հատուկ եզրակացությունն է»,-ասաց նախարարը։
Շահագործումից հանելու գործընթացն իրականացվում է Հայաստանի Հանրապետության օրենսդրության, քաղաքաշինական նորմատիվ-տեխնիկական փաստաթղթերի և Ատոմային էներգիայի միջազգային գործակալության անվտանգության ստանդարտների պահանջներին համապատասխան:
Հայկական ատոմակայանը գտնվում է Երևանից 28 կմ դեպի արևմուտք` Արարատյան դաշտավայրում: ՀԱԷԿ-ն ունի երկու էներգաբլոկ, որոնք կառուցված են ВВЭР-440 տեսակի երկու սեյսմակայուն ռեակտորների հիման վրա: ՀԱԷԿ-ի առաջին էներգաբլոկը շահագործման է հանձնվել 1976 թվականի դեկտեմբերի 22-ին, երկրորդը `1980 թվականի հունվարի 5-ին: Այժմ գործում է ՀԱԷԿ-ի 2-րդ էներգաբլոկը, որն ապահովում է հանրապետությունում սպառվող էլեկտրաէներգիայի 40% —ը: ՀՀ կառավարության որոշմամբ, 2015 թվականին աշխատանքներ սկսվեցին կայանի շահագործման ժամկետները երկարաձգելու համար:
