04:17 24 հոկտեմբերի 2017
Ուղիղ եթեր
Վաղարշակ Հարությունյան

Վաղարշակ Հարությունյանը ԵԱՏՄ և ՀԱՊԿ ընդդիմախոսներին խորհուրդ է տալիս կարդալ

© Sputnik/ Asatur Yesayants
Հայաստան
Ստանալ կարճ հղումը
9830

Թուրքիայի կամ Ադրբեջանի հնարավոր ագրեսիային կարձագանքեն ոչ միայն Հայաստանում տեղակայված ռուսական ռազմական ուժերը, այլև հակաօդային, ռազմածովային և նույնիսկ տիեզերական ուժերը։ ՀՀ և ՌԴ ռազմական համագործակցության որոշ փակագծեր է բացել պաշտպանության նախկին նախարար Վաղարշակ Հարությունյանը` ընդդիմախոսներին խորհուրդ տալով կարդալ պայմանագրերը։

ԵՐԵՎԱՆ, 12 հոկտեմբերի – Sputnik. ՀՀ ԱԺ-ն բուռն քննարկումներից հետո վավերացրեց ՀՀ և ՌԴ միացյալ ռազմական խմբավորում ստեղծելու մասին համաձայնագիրը։ Պաշտպանության նախկին նախարար Վաղարշակ Հարությունյանը համաձայնագրի ընդդիմախոսներին խորհուրդ է տալիս քննադատելուց առաջ ծանոթանալ երկու երկրների միջև ավելի վաղ ձևավորված այլ իրավական հիմքերին։ Նա մասնավորապես նշում է Հայաստանի տարածքում ռուսական ռազմական բազայի տեղակայման և ՀԱՊԿ պայմանագրերը։

«Հիմա նայենք բազայի պայմանագրի հիմնական կետը, որում նշված է, թե ինչի համար է այդ բազան ստեղծվել, ինչպես նաև ՀԱՊԿ պայմանագիրը։ Հստակ գրված է` ագրեսիայի դեպքում կանխել այն։ Սա մի խնդիրն է, մյուսը` մենք ունենալով այսպիսի պայմանագրեր և լինելով նման կազմակերպությունների անդամ` ուժեղացրել ենք մեր ազգային բանակը»,- Sputnik Արմենիայի հետ զրույցում ասաց Հարությունյանը։

Իսկ հնարավոր ագրեսիայի կանխման համար, նրա խոսքով, պետք է ստեղծվեն այդ նպատակին ծառայող տարբեր զորամիավորումներ։

«Հիմա հարց է առաջանում` Թուրքիայի կամ Ադրբեջանի հնարավոր ագրեսիայի դեպքում ինչպե՞ս են գործելու հայկական և ռուսական բանակները։ Ագրեսիայի դեպքում մասնակցելու են ոչ միայն այստեղ տեղակայված ռուսական ռազմաբազայի ուժերը, այլև, օրինակ կովկասյան այլ քաղաքներում` Ռոստովում, Բուդյոնովսկում տեղակայված ռազմաօդային ուժերը։ Թուրքիայի դեպքում կգործի նաև սևծովյան նավատորմը, Ադրբեջանի դեպքում` Կասպյանը։ Մենք կօգտվենք ՌԴ ամբողջ ռազմաօդային ու տիեզերական ուժերի հնարավորություններից»,- ասաց նախկին նախարարը։

Ինչ վերաբերում է Ռուսաստանի և Ադրբեջանի նմանօրինակ ռազմական համագործակցության հավանականությանը, Հարությունյանը հիշեցրեց, որ Ադրբեջանը ոչ միայն ՌԴ-ին, այլև մի շարք այլ երկրների նման առաջարկով դիմել է, բայց` ԼՂ հարցը լուծելու պայմանով, ուստի մերժում է ստացել։

«Եթե խոսում ենք որևէ զորամիավորում ստեղծելու մասին, նախ պետք է հասկական, թե այն ում դեմ պետք է ուղղված լինի,- ասում է Հարությունյանը։- Եթե Ադրբեջանն ու Ռուսաստանը նման միավորում ստեղծեն, այն կարող է ուղղված լինել կա՛մ Իրանի դեմ, ինչին Ռուսաստանը բնականաբար չի գնա, կա՛մ այլ պետությունների, ասենք` Ղազախստանի, Թուրքմենիայի, կա՛մ Հայաստանի դեմ։ Իսկ այդ պարագայում Ռուսաստանը կմտնի այդ երկրների հետ հակասության մեջ, ինչը ևս չի բխում Ռուսաստանի շահերից»։

Ադրբեջան-Ռուսաստան ռազմական դաշնակցությունը Հարությունյանն անհավանական է համարում նաև այն պատճառով, որ Ադրբեջանն իր ամենաբարեկամական երկիր է համարում Թուրքիային, մինչդեռ այդ երկրի հանրությունը Ռուսաստանն ընկալում է որպես Հայաստանին աջակցող երկիր։

Հայ-ռուսական միացյալ զորախումբ ստեղծելու մասին համաձայնագիրը ստորագրվել է 2016 թվականի նոյեմբերի 30-ին Մոսկվայում։ Այս տարվա մարտի 15-ին ՀՀ և ՌԴ նախագահները Կրեմլում կայացած բանակցություններից հետո բարձր գնահատական էին տվել ստեղծվող միացյալ զորախմբին։

Միացյալ զորախմբի հրամանատարը նշանակվում է և պաշտոնից հեռացվում Հայաստանի ԶՈՒ Գերագույն հրամանատարի` նախագահի կողմից՝ Ռուսաստանի ԶՈՒ գլխավոր հրամանատարի հետ համաձայնեցմամբ։

Խաղաղ ժամանակ հրամանատարությունը ենթարկվում է ՀՀ ԶՈՒ գլխավոր շտաբի ղեկավարին, անմիջական վտանգի և պատերազմի ժամանակ` կախված ստեղծված իրավիճակից, ռուսական բանակի ՀՌՕ զորքերի հրամանատարությանը կամ ՀՀ ԶՈՒ շտաբի ղեկավարների կոմիտեին, երկու երկրների ԶՈՒ գլխավոր հրամանատարների որոշմամբ։

Գլխավոր թեմաներ