ԵՐԵՎԱՆ, 19 հոկտեմբերի–Sputnik. Սփյուռքահայ գործիչներից մեկը` Կարապետ Տագէսեանը, Բրյուսելում ընթացող Եվրոպայի հայկական 4-րդ համաժողովի ընթացքում հայտնել է`50 տարուց 7 միլիոնանոց հայկական սփյուռքից կմնա մոտ 1 միլիոն մարդ։
Համաժողովին ներկա տեղեկատվական անվտանգության փորձագետ Սամվել Մարտիրոսյանը պատմեց, որ այդ դիտարկումը գիտական հիմքեր չունի, սակայն բոլոր գնահատականներն ահազանգում են` շտապ գործողություններ է պետք գործադրել։
«Հիմնականում, խոսվում էր հետևյալի մասին. հայկական համայնքները, որոնք չեն զարգանում, հատուկ կրթական ծրագրեր չեն ունենում, շատ արագ ասիմիլացվում են։ Արամ Ա կաթողիկոսը ևս խոսեց այն մասին, որ Սփյուռքը մաշվում է։ Այստեղ հայկական լոբբիստական կազմակերպություններ են ներկա, խոսակցություն կա, որ ստեղծեն օնլայն հարթակներ ավելի մեծ մարդկանց կրթելու, լեզվի խնդիրները լուծելու համար»,– պատմեց Մարտիրոսյանը։
Հատուկ շեշտադրում է արվել այն հանգամանքի վրա, որ Հայաստանը Սփյուռքի համար պետք է լինի կենտրոնացված ուժ։
«Հայաստան ասելով շատ սփյուռքահայեր պատկերացնում են Արևմտյան Հայաստանը։ Այսօրվա Հայաստանը ժամանակավոր մի երևույթ են ընկալում, սա շատ վտանգավոր միտում է։ Կարևոր է, որ սփյուռքահայ կազմակերպությունները շեշտադրումներ անեն, ու Հայաստանն ընկալվի որպես հայերի հայրենիք ու միակ պետություն»,– ասաց Մարտիրոսյանը։
Համաժողովի այսօրվա նիստը կայացել է Եվրապառլամենտում։ Ի դեպ, հայկական պատվիրակության հետ Հայաստանի արտաքին քաղաքականությունը քննարկելու են եկել նաև եվրոպացի պատգամավորներ։ Նրանց թվում են`Եվրոպական խորհրդարանի պատգամավորներ Ֆրանկ Էնգելը և Էլենի Թեոխարիուսը։
Քննարկման կիզակետում էլ եղել է Արցախի հիմնախնդիրը։ Տեղեկացնենք, որ երկու պատգամավորներն էլ ժամանակին այցելել են Արցախ, կարծիք հայտնել, որ Արցախում պետք է պահպանվի ժողովրդավարությունն ու ազատությունը։
