ԵՐԵՎԱՆ, 30 հոկտեմբերի — Sputnik. Կոալիցիոն կառավարության մաս կազմող ՀՅԴ-ի խորհրդարանական խմբակցության ղեկավար Աղվան Վարդանյանը 2018 թ.-ի բյուջեի նախագիծը մանրամասն չի ուսումնասիրել, բայց համաձայն է կառավարության վարած քաղաքականության հետ: Այդ մասին նա այսօր հայտնեց ԱԺ-ում լրագրողների հետ հանդիպմանը:
Ինչ վերաբերում է չավելացող սոցիալական ծախսերին, Աղվան Վարդանյանն այստեղ էլ կիսում է կառավարության այն դիրքորոշումը, որ դա կարելի է անել միայն 5% տնտեսական աճ ապահովելու պայմաններում:
«Կարևորը դա տեսնելն է կառավարության գործունեության մեջ՝ իբրև հիմնական փոփոխություն»,- ասաց Վարդանյանը:
Թե ինչի կհասցնի Հայաստանը գործադիր իշխանության որդեգրած տնտեսական քաղաքականությունը, Աղվան Վարդանյանը չշտապեց կանխատեսել՝ ասելով, որ դեռ հնարավորություն կունենա:
«Այստեղ ենք լինելու, չէ՞, դեռ առնվազն մի քանի տարի, կտեսնենք՝ կասենք»,- ասաց նա:
Ընդդիմադիր «Ելքը», հակառակը, 2018 թ.-ի բյուջետային քաղաքականության հետ որևէ հույս չի կապում՝ հայտարարելով, որ կառավարությունը վարում է աղքատության խորացման քաղաքականություն:
«Արդեն 3 տարի կենսաթոշակները, նպաստները չեն բարձրացել, բայց դրա փոխարեն այդ տարիներին գրանցվել է 6.7% գնաճ։ Մենք բյուջեն գնահատում ենք բացարձակապես ոչ ադեկվատ»- լրագրողների հետ հանդիպմանը հիշեցրեց «Ելք» խմբակցության ղեկավար Նիկոլ Փաշինյանը:
Հիշեցնենք, Խորհրդարանում այսօրվանից մեկնարկել են 2018թ-ի բյուջեի նախագծի քննարկումները՝ ԱԺ մշտական հանձնաժողովներում:
